CIG-Banca rexeita o ERE do Sabadell en Galicia logo duns beneficios de 220 millóns no primeiro semestre do ano
Así o trasladou a sección sindical do banco nunha reunión convocada este xoves pola dirección da entidade, como paso previo á constitución da mesa negociadora e para dar comezo a reunións do período informal establecido por convenio, que ten unha duración de dez días.
Por E.P. | SANTIAGO DE COMPOSTELA | 03/09/2021 | Actualizada ás 19:38
A CIG-Banca mostrou o seu "rexeitamento máis rotundo" aos ERE que pretende aplicar o Banco Sabadell e que afectaría a 1.900 traballadores en Galicia. En concreto, un expediente de despedimento colectivo, outro de mobilidade xeográfica e outro de modificación substancial de condicións de traballo.
O sindicato cuestionou a presentación do ERE despois de que a entidade lograse un beneficio de 220 millóns de euros no primeiro semestre do ano, un 51 por cento máis que en 2020. É por iso que advirte de que presentará "batalla" e avisa de que haberá "conflito" en caso de despedimentos.
Así o trasladou a sección sindical do banco nunha reunión convocada este xoves pola dirección da entidade, como paso previo á constitución da mesa negociadora e para dar comezo a reunións do período informal establecido por convenio, que ten unha duración de dez días.
A CIG advirte que "no banco non sobra ninguén" e ironiza coa contratación este ano de 200 'talentos' e unha decena de colaboradores para reorganizar a cúpula directiva e que agora se tente aplicar este ERE.
"A súa conclusión é que hai que acomodarse ás circunstancias do mercado, buscar unha sustentabilidade a longo prazo e axustar custos, cando no seu plan estratéxico aseguraban que non acometerían máis recortes de persoal despois do axuste de 1.800 persoas que saíron no primeiro trimestre do ano", denuncian.
