Por E.P. | SANTIAGO DE COMPOSTELA | 05/11/2021 | Actualizada ás 13:33
A Garda Civil incorporou seis equipos especializados en ciberdelincuencia para loitar en Galicia contra este tipo de delitos, que entre xaneiro e setembro deste ano aumentaron un 71,27% e supoñen un 20,39% do total de infraccións penais.
Así o apuntou o delegado do Goberno en Galicia, José Miñones, na presentación destes novos equipos, nun acto que contou coa presenza do xeral xefe da 15 Zona da Garda Civil, Luís Francisco Rodríguez, e a subdelegada do Goberno na Coruña, María Rivas.
O delegado do Goberno lembrou que un de cada seis delitos que se producen son por estafas en Internet e que estes xa supoñen o 20,39% do total de delitos. As persoas que máis sofren este tipo de ciberdelitos teñen entre 26 e 40 anos.
Para loitar contra esta problemática, puxéronse en marcha os 'Equipos @' que operan desde onte xoves, e que están integrados por 20 gardas civís dedicados en exclusiva a esta problemática.
Os 'Equipos @' operan baixo a coordinación dos respectivos Equipos de Investigación Tecnolóxica das Unidades Orgánicas da Policía Xudicial. Hai dous na provincia da Coruña, un na Coruña cidade e outro en Milladoiro, en Santiago de Compostela; dous na cidade de Ourense, e outros dous nas cidades de Pontevedra e Lugo. Estes equipos encargaranse de formar e asesorar neste tipo de delincuencia.
NON FACILITAR DATOS
No acto, o sarxento Alberto González, xefe do 'Equipo @', sinalou algunha das medidas que se deben de ter en conta á hora de operar en internet. Para González, o máis importante é "non mandar fotos do DNI, non facilitar ningún dato persoal e non pulsar en ningunha ligazón que se reciba".
O sarxento mostrou a súa preocupación polo 'fishing' que consiste na captación de datos, que antes se facían por correo e sms, pero que agora se fai tamén a través das chamadas. "Que alguén che chame e fáleche en galego achégache a esa persoa e xera máis engano", apuntou.
Outra problemática é a compravenda entre particulares, nas que non se envía o diñeiro ou o produto. González tamén sinalou a estafa de facturas, na que se intervén a comunicación de dúas empresas para que se realicen pagos modificando a conta bancaria das facturas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.