O emprego "verde", unha saída á despoboación do medio rural?

A Deputación de Pontevedra puxo en marcha o proxecto 'Depoforest - Xestión integral e aproveitamento de piñeirais' coa finalidade de "facer fronte ao reto demográfico e ao despoboamento territorial". Para isto, a institución provincial sinalou nun comunicado que aposta pola "creación de emprego verde no medio rural" e contribuír así "á protección integral do monte dentro dunha estratexia forestal diversa e sustentable".

Este proxecto está cofinanciado ao 90% polo Fondo Social Europeo a través do Programa Empleaverde da Fundación Biodiversidade do Ministerio para a Transición Ecolóxica e o Reto Demográfico. Segundo explican dende o ente provincial, con 'Depoforest' pretenden introducir a través de formación os coñecementos necesarios para realizar unha mellor xestión da superficie forestal da provincia a longo prazo e obter o maior beneficio, e conseguir así unha mellor madeira de calidade. Ademais, tamén buscan introducir actividades económicas que axuden a obter o mellor produto con vistas aos próximos 15 ou 20 anos e poder ser fonte de ingresos complementarios de maneira máis periódica.

Unha das actividades na que se centrará é a extracción de resina, "cun gran potencial". Así, pretenden que se converta nunha gran oportunidade laboral para os habitantes do medio rural de moitas zonas da provincia.

Por outra banda, a Deputación de Pontevedra, a través de SmartPeme, oferta esta semana seis novas accións formativas impartidas vía en liña, enmarcadas na carteira de talleres que se imparten de forma telemática. Así, este martes 26 pola mañá, Laura Carreira, graduada en Publicidade e Relacións Públicas, será quen imparta o taller 'Impulsa a cultura sustentable e a responsabilidade social no teu negocio', un taller para dar a coñecer a aplicación da RSC (Responsabilidade Social Corporativa) nas Pemes coa fin de mellorar a súa contorna e percepción por parte dos seus clientes.

Os bosques de Montirón (Guido Álvarez Parga)