Por Galicia Confidencial | SANTIAGO DE COMPOSTELA | 22/09/2022 | Actualizada ás 11:51
Ollo é un colectivo fotográfico que vén de nacer en Galicia. Dende unha óptica multidisciplinar, o proxecto agroma "vencellado á creación, divulgación e difusión de historias relevantes para a sociedade a través da linguaxe da imaxe e da narrativa audiovisual", tal e como explican na súa presentación.
As figuras vinculadas ao fotoxornalismo que integran Ollo son Vanessa Casteleiro, Óscar Corral, Agostiño Iglesias, Brais Lorenzo, Óscar Pinal, Adra Pallón e Paula Quiroga; e completan o equipo Sara García e Daniel Lázare no referente ao apartado de xestión cultural e Sabela Eiriz como colaboradora nas tarefas de edición e curadoría.
O fin principal do colectivo, segundo explican nun comunicado, é "xerar reflexión na poboación ante as diversas problemáticas sociais e mediambientais ás que se enfronta a actual sociedade". "Para acadar este fin unímonos persoas pertencentes a diversos eidos tales como o fotoxornalismo, o documentalismo gráfico e videográfico e a xestión cultural", proseguen.
O proxecto colaborativo apóiase na creación de proxectos culturais, na oferta formativa e no desenvolvemento de proxectos editoriais e comerciais. Ollo inicia agora a súa andaina en redes botando man da colaboración coa revista 5W a través do proxecto Lumes, un traballo fotográfico en progreso de máis de quince anos de imaxes e experiencias arredor dunha problemática ben coñecida pola sociedade galega: o desastre ambiental e social provocado polos incendios que asolagan o territorio ano tras ano.
A través das súas propias redes, anuncian, desvelarase proximamente unha presentación pública do colectivo, ademais doutros proxectos nos que xa están inmersos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.