Angrois: O tramo da curva "podía estar mellor sinalizado" segundo o xefe de circulación de Santiago
A preguntas do fiscal, advertiu de que o risco dese tramo da liña escoitoullo a varios maquinistas cando estaban "a comentar cousas do traballo", no momento en que realizaban as probas da liña.
Por Europa Press / Redacción | SANTIAGO DE COMPOSTELA | 27/10/2022 | Actualizada ás 14:22
O xefe de circulación da estación de Santiago, José Luís Carreira, empregado de Adif, constatou que o tramo no que se produciu o accidente do Alvia na liña que conecta Ourense coa capital galega "podía estar mellor sinalizado".
Durante a súa declaración no xuízo polo sinistro, que durou algo menos de 40 minutos, o xefe de circulación da estación compostelá sinalou que a entrada na bifurcación da Grandeira é "complicada", pero engadiu que el "non" percibiu risco de descarrilamento.
En calquera caso, a preguntas do fiscal, advertiu de que o risco que entrañaba ese tramo da liña escoitoullo a varios maquinistas cando estaban "a comentar cousas do traballo", no momento no que se realizaban as probas da liña.
"Non o comentabamos todos os días, pero si se ten comentado algunha vez", dixo. "E vostede fixo algo?", preguntoulle o representante do Ministerio Público, ao que este traballador respondeu que non o fixo porque non é maquinista nin coñece "o perigo da curva" porque non circula por ela.
Así, aclarou que os maquinistas "comentaban o tema entre eles" e el era "máis ben un espectador". "Eu estou nun posto de control, nada máis", puntualizou.
Neste sentido, dixo que "todo é mellorable" pero que non era o seu "labor" comunicar estas circunstancias. "Eu podo trasladar avarías que me ocorren a min, no meu sistema. Se son reiteradas ou non son reiteradas. Avarías concretas do meu sistema. Nada máis", resolveu.
O FALLO HUMANO
A cuestións do avogado da asociación de vítimas Apafas, José Luís Carreira afirmou que el non participa en reunións con persoal de seguridade, mentres que á avogada do estado indicoulle que o computador protexe contra o fallo humano, "ten incompatibilidades" que non lle permite facer.
Isto foi aproveitado polo avogado que defende ao maquinista --uno dos dous acusados, xunto ao ex xefe de seguridade de Adif-- na súa quenda, cando lle interrogou sobre que é o que protexe do erro humano a un maquinista. "Imaxino que o sistema de sinais. Debería", incidiu este xefe de circulación.
A maiores, precisou que o sinal E'7, en vía libre --a que tomaban como referencia algúns maquinistas para comezar o freado de 200 a 80 quilómetros por hora ante a ausencia doutros sinais--, "non indica ningunha velocidade", senón simplemente que se pode circular sen ningún tipo de restrición, seguindo o libro horario e o cadro máximo de velocidades.
"VISITAS DE SEGURIDADE"
Noutro punto dos interrogatorios, Carreira foi interpelado polo seu coñecemento sobre as funcións de seguridade na circulación. "Entro en contacto con eles porque tamén me vixían a min. Eu teño visitas de seguridade para saber que o meu servizo está en condicións de seguridade. E teño unha habilitación", respondeu.
En concreto ao letrado que defende ao exdirectivo de Adif, ao que se lle imputa pola avaliación de riscos na liña, apuntoulle que "avaliacións de risco son unhas cousas e visitas de seguridade son outras". "O que me fan a min son visitas", aclarou.
Por último, o avogado do maquinista Francisco Garzón cuestionoulle sobre "a quen correspondía en Adif verificar se había un risco", ao que este xefe de circulación dixo que "ao persoal que analiza os riscos da liña". E precisou: "Hai un departamento en Adif para iso".
