Angrois.- Cargos de Renfe aos que chegou o aviso admiten que o punto era "crítico" pero non se lle deu "transcendencia"

O superior inmediato do xefe de maquinistas que avisou do risco de accidente en Angrois (Santiago), José Luís Rodríguez Vilariño, afirmou que considerou que ese era un "punto crítico" pero que "se axustaba a norma", en relación á curva da Grandeira, onde descarrilou un tren Alvia en xullo de 2013 deixando 80 mortos e 145 feridos.

A continuación, o membro do equipo da xerencia de seguridade na circulación de Renfe Viaxeiros Anxo Lluch negou que lle chegase ese correo electrónico, pero si recoñeceu manter unha conversación con José Ramón Igrexas Mazaira, o xefe de maquinistas que trasladou o aviso. "Aquilo era unha situación normativa perfecta", chegou a afirmar.

Na décimo primeira xornada do xuízo polo sinistro do Alvia, Rodríguez Vilariño compareceu en calidade de testemuña proposta polo letrado do maquinista que circulou ata Ourense, Javier Illanes.

No banco dos acusados sentan o ex director de seguridade na circulación de Adif, Andrés Cortabitarte, pola análise de riscos da liña, e o maquinista Francisco Garzón, por frear tarde ao atender unha chamada do interventor e tomar a curva cun exceso de velocidade.

A continuación declarou o membro do equipo da xerencia de seguridade na circulación de Renfe Viaxeiros Anxo Lluch Perales, a proposta do avogado de Garzón, e defendeu que a curva "estaba reglamentariamente sinalizada".

SARDÓN E IZQUIERDO, ESTE XOVES

Rodríguez Vilariño explicou que remitiu o correo electrónico co aviso de Igrexas Mazaira ao xerente Rafael Sardón, ao xefe de produción Nicolás Izquierdo e ao seu mando "directo", Javier Pérez. Os dous primeiros comparecen este xoves no xuízo.

En concreto, o xefe de maquinistas José Ramón Igrexas Mazaira redactou un informe en decembro de 2011 no que, entre outras cuestións, expuña "estudar a posibilidade de solicitar a implantación en vía de sinais de limitación permanente a 80 quilómetros por hora, que poderían facilitar o cumprimento das velocidades máximas".

E é que, segundo avisaba, nesa zona "unicamente existe un sinal de velocidade descendente (PTO) á altura do punto quilométrico 84.230, pero de pouco vale posto que de non reducir previamente a velocidade, nada se poderá facer xa".

TRASLADALO A ADIF

Ante as preguntas das partes, Rodríguez Vilariño respondeu que non lle consta se este aviso chegou a Adif, empresa con que non mantiña reunións.

Así mesmo, asegurou non lembrar quen de Renfe era o encargado de trasladar este tipo de asuntos ao administrador da infraestrutura ferroviaria.

Sobre se el viu un risco na curva, recoñeceu que considerou que era "un punto crítico", pero argumentou que non é "experto en seguridade".

Quen na actualidade é xefe de área de produción de servizo público contestou tamén ás cuestións do fiscal, ao que dixo que esta foi "a única" persoa que lle alertou dese "punto crítico".

"UNHA CUESTIÓN TÉCNICA"

"Cando leo, efectivamente leo o escrito enteiro e comprobo que o que di o señor Mazaira axústase correctamente á normativa vixente e en consecuencia non teño...", expúxolle. "Non o valora como un tema de seguridade? Non, valóroo como unha cuestión técnica", proseguiu.

Neste senso, incidiu en que "o informe do señor Mazaira non trasgredía ningunha norma pola que eu tivese que trasladar" a súa advertencia.

O representante do Ministerio Fiscal interrogoulle entón se a suxestión de instalar sinais "non lle pareceu relevante", e el admitiulle que non lle pareceu "relevante ao momento que se ve agora". "Agora está claro, efectivamente, xa se cambiou todo", resolveu o fiscal.

Sobre se se debateu na comisión este punto concreto, indicou que "non se tratou" e que "o secretario non considerou" que se fixese porque "non lle deu transcendencia e pasou de puntos".

Pola súa banda, intúe que "entre outras razóns" isto debeuse a que "é un tema que implicaba ao Adif e aí non había interlocutores do Adif".

O xefe de maquinistas José Ramón Igrexas Mazaira, á súa chegada ao xuízo polo accidente do tren Alvia | Fonte: Europa Press