Os londinenses MFC Chicken e os galegos Moura pechan o 'Outono Códax 2022'

Todo o bo ten un final, e o Outono Códax 2022 tamén... mal que nos pese. Foi un intenso e excitante mes de novembro no que houbo sete concertos con dez bandas enriba do escenario.

No que respecta ás actividades paralelas o balance tamén é moi positivo con tres ceas con maridaxe musical, dúas presentacións de libros, un ciclo de cinema, unha noite de monólogos, dúas sesións con disyóqueis e dúas catas con maridaxe. Todo o anterior acredita que o festival no seu conxunto conta cunha programación equilibrada, atractiva e contextualizada á filosofía do evento e á época do ano no que se realiza.

FIN DE FESTA

Este mércores 30 de novembro o Outono Códax 2022 baixa o telón cunha dobre cita por todo o alto na Sala Capitol ás 20:30 h. En palabra dos organizadores "arrincará coa escura e cativadora intensidade de Moura e rematará cunha traca final desbordante de festa, baile e rock and roll a cargo de MCF Chicken".

Hai xa uns anos que o carismático vocaista e saxofonista Spencer Evoy chegou a Londres e xuntou a un grupo de frenéticos e famentos músicos nun restaurante de polo frito de Holloway Road para levar a cabo unha misión sacra: levar os sons do rock’n’roll do Pacific Northest ao público británico.

Alí naceu MFC Chicken, un dos grupos cun show máis excitante do garaxe-rock’n´roll do Reino Unido, cun estilo que chegou a ser definido como "a música que os Sonics escoitaban". "MFC Chicken son considerados como o grupo de rock and roll con mellor directo de Europa. Tamén se di deles que son unha banda de rock and roll das que non quedan". (Ara Info)

O seu último traballo data de 2020, Fast Food And Broken Hearts, e nel desátanse frenéticos, como polo sen cabeza, a ritmo vetusto rock’n’roll dos anos 50, garaxe-punk, rhythm and blues e frat-rock canalla.

Antes dos londinenses estará no escenario 'Moura', unha banda formada por Diego Veiga, Hugo Santeiro, Fernando Vilaboy, Luis Casanova, Pedro Aguado e Belém Tajes.

A formación galega vén de presentar neste 2022 o seu agardado segundo traballo de estudio, Axexan, espreitan, no que profundizan aínda máis na tradición galega, tanto a nivel lírico coma instrumental. En palabras da organización "a súa proposta transita a medio camiño entre a neo-psychedelia, o rock progresivo e o kraut-rock, xunto á tradición musical galega".

Entradas á venda en: A Reixa-Matrioska (Compostela) e tamén en www.ataquilla.com