Poden celebrarse xuízos polas tardes para recuperar o tempo perdido na folga de letrados?

O presidente do Tribunal Superior de Xustiza de Galicia, José María Gómez e Díaz-Castroverde, considera que a suspensión de actuacións procesuais (xa 17.000) que deixa a folga de letrados xudiciais, "unha cifra grave e importante", "deixa unha situación xa non conxuntural, senón estrutural, que haberá que absorber nos xulgados dalgunha maneira".

Díaz-Castroverde expresábase así este mércores tras a inauguración en Santiago das xornadas 'A protección do patrimonio histórico e a súa conexión co urbanismo', que presentou el mesmo xunto ao conselleiro de Cultura, Educación, Formación Profesional e Universidades da Xunta, Román Rodríguez.

"En Galicia temos experiencia, lamentablemente, en recuperación da actividade xudicial despois de circunstancias anormais como a folga do 2018 ou a pandemia. A realidade é que efectivamente será necesario establecer criterios de volta á normalidade, en coordinación co Consello do Poder Xudicial", sinalou. Segundo apuntou, ten as necesidades detectadas pero "non depende do Tribunal" pór solución a eses problemas.

Preguntado pola posibilidade de que se celebren xuízos pola tarde, o presidente do TSXG comentou que "non é de sinxela execución" porque non só intervén o xuíz. "É prematuro facer este tipo de reflexións porque tamén hai que ter en conta que é o momento do día no que os xuíces ditan resolucións e fórmanse sobre a última xurisprudencia"

"Toda a colaboración é boa pero non depende de min, nin do Tribunal Superior, establecer os criterios. En canto a aumentos do persoal, dependen da Xunta, do Consello Xeral do Poder Xudicial ou do Ministerio, algo que nós non podemos decidir", indicou.

Acto de ascenso na carreira xudicial. TSXG