Suspéndese a audiencia preliminar contra Anxo R.D., acusado de asasinar á súa exparella en Baiona
A Fiscalía atribúelle un delito de asasinato con agravantes de xénero e parentesco e dous de lesións psíquicas graves.
Por Europa Press / Redacción | Santiago de Compostela | 12/09/2025 | Actualizada ás 12:36
A sección quinta da Audiencia Provincial de Pontevedra, con sede en Vigo, suspendeu a audiencia preliminar sobre o presunto crime machista de Baiona para examinar distintas probas documentais e periciais expostas pola acusación. Desta maneira, a Audiencia adiou este trámite para o vindeiro xoves, día 18 de setembro, ás 10.00 horas.
Ao acto deste venres acudiu o procesado, Anxo R.D., que se atopa en prisión provisional e para o cal Fiscalía pide penas que suman ata 33 anos de cárcere, como asasino da súa exparella, Beatriz L.G., ás portas do seu domicilio de Baiona en febreiro de 2023 e en presenza dos dous fillos menores de ambos.
En concreto, o ministerio público atribúelle un delito de asasinato coas circunstancias agravantes de xénero e parentesco, e dous delitos de lesións psíquicas graves, cometidos sobre os seus fillos (que tiñan 6 e 9 anos cando presenciaron os feitos), coa agravante de parentesco.
Segundo recolle o escrito de acusación, os feitos ocorreron a última hora da tarde do 5 de febreiro de 2023, cando o acusado levou aos seus fillos de volta á vivenda da súa nai, no barrio baionés da Percibilleira.
Cando a muller saíu ao encontro, o acusado, que levaba encima un coitelo e unha machada, atacouna, sen que ela tivese oportunidade de escapar. "Con ánimo de acabar coa vida desta, abalanzouse sobre ela e cravoulle varias veces o coitelo no pescozo, o peito, chegando a alcanzar o fígado, lesionándolle así mesmo o rostro e mesmo as costas", recolle o escrito do Ministerio público, que tamén sinala que, cando Beatriz estaba xa tirada ou encolleita no chan, golpeouna repetidamente coa machada na cabeza.
O avogado do acusado, Saúl Villar, explicou que este venres as partes estiveron negociando algún tipo de acordo sobre as penas. O letrado indicou que o seu defendido estaría de acordo en chegar a unha conformidade sempre que se lle rebaixen "un pouco" as penas solicitadas. Villar engadiu que agora se estudarán os documentos expostos e a semana que vén celebrarase a vista preliminar prevista nun primeiro momento para hoxe venres.
