Convocan folga indefinida de limpeza en Santiago en plenas festas da Ascensión

O comité de empresa de Urbaser en Santiago de Compostela convocou unha folga indefinida do servizo de limpeza e recollida de lixo desde o vindeiro luns 15 de maio para reclamar que se cumpra o convenio e que "se manteñan os dereitos" que tiñan ata o momento "desde hai 40 anos".

"Queremos recalcar que isto non é unha folga económica, non pedimos unha subida salarial. Pedimos que se nos sigan mantendo os acordos que temos desde hai 40 anos. Agora quérennos eliminar todo", relatou Alfonso Giadáns, representante de CC.OO. Por iso, entre as súas reclamacións, o presidente do comité de empresa, Ricardo Méndez, denunciou o incumprimento das rotacións, da conciliación de vida laboral e familiar, así como que non se convocan prazas de condutores.

Outra das demandas que solicita o comité é a mellora dos vestiarios, xa que o vestiario feminino é "compartido cun almacén". Sobre as instalacións da rúa Pitelos, Méndez asegurou que é "un vestiario de fai uns 40 anos" que agora é "perigoso", con "risco de caída de obxectos" e que "se alaga cada vez que chove".

CRÍTICAS AO CONCELLO

De non alcanzar un acordo, os traballadores irán á folga a partir do 15 de maio, coincidindo coa semana das festas da Ascensión. Ante esta situación, o comité afirmou que ninguén do Concello de Santiago se puxo en contacto con eles. "Non nos escoita, non nos recibe e non tivemos nin unha soa chamada para interesarse polo problema que ten o servizo", sinalaron.

BUGALLO PIDE "RESPONSABILIDADE"

Ante esta convocatoria, o alcalde da capital galega, Xosé Sánchez Bugallo, recoñeceu que esta folga lles xera "preocupación" porque ademais "é probable que non sexa a única". Con todo, sinalou que as datas elixidas "non son froito dunha casualidade", posto que "se busca a coincidencia" coas festas da Ascensión e, "sobre todo", coa campaña electoral.

"O ano pasado estabamos no proceso de negociación do convenio, e non houbo folga e tamén había festas da Ascensión. Este ano, co convenio asinado, convócase folga coincidindo coa campaña electoral", expuxo o rexedor.

Así, asegurou que o Concello "ten que respectar o contrato" coa empresa, polo que nos acordos "extraconvenio" é "moi difícil entrar". "Se hai cláusulas do convenio que non se cumpren, algo teremos que dicir. O que está fóra do convenio é un tema máis complexo", resumiu.