Por Europa Press / Redacción | SANTIAGO DE COMPOSTELA | 21/06/2023 | Actualizada ás 13:42
A plataforma de vítimas do accidente do tren Alvia respondeu á intervención do fiscal este mércores no xuízo ironizando con que "seguramente unha chamada corporativa do seu xefe foi a causa directa" do seu cambio de postura, ao retirar a acusación ao ex director de seguridade de Adif, Andrés Cortabitarte, pola análise de riscos da liña na que morreron 80 persoas e 145 resultaron feridas.
Nun comunicado remitido aos medios de comunicación baixo o encabezado 'O caso Alvia, a maquinaria do Estado e as chamadas que o cambian todo', a plataforma critica que o fiscal retirase esa acusación --mantena contra o maquinista-- e engade que, pola súa banda, "RTVE continúa a censura", en referencia ao documental sobre o sinistro ferroviario.
"Cúmprense 10 longos anos loitando por destapar todo o que hai detrás desta traxedia, esixindo que se depuren responsabilidades a todos os niveis, pelexando contra as institucións implicadas e contra o propio Estado, que empregaron todos os seus medios para ocultar as neglixencias e os incumprimentos da normativa que hai detrás do desastre da traxedia", advirten as vítimas na nota de prensa.
Tras coñecer este martes a que denominan "última manobra orquestrada pola Fiscalía", pola retirada da acusación contra Adif "sen ningunha razón de peso, xa que durante a fase oral viuse con máis claridade os incumprimentos normativos de seguridade", censura que este mércores afirmou que a chamada que atendeu o maquinista "é a única causa do accidente".
"A explicación deste xiro de guión é sinxela, o fiscal, cuxo xefe é nomeado polo Goberno, estaba a acusar a un organismo (Adif) que pertence ao Estado, e ao que precisamente defende a propia Avogacía do Estado, cuxo xefe tamén é nomeado polo goberno", destaca.
Neste sentido, afirma que "seguramente unha chamada corporativa do seu xefe foi a causa directa deste cambio do fiscal".
"Os diferentes gobernos non cumpriron coa obrigación de levar a cabo unha investigación técnica independente tal e como veu reclamando a Unión Europea. Se han abertos procedementos de infracción por incumprimento da normativa de seguridade ferroviaria e constatamos as presións á Unión Europea para impedir a publicación do informe", prosegue.
ACUSACIÓN POPULAR CONTRA ADIF
Por outra banda, as acusacións populares no xuízo polo accidente do tren Alvia, que provocou 80 mortes e deixou a 145 persoas feridas no barrio compostelán de Angrois o 24 de xullo de 2013, sinalaron ao ex alto cargo de Adif, Andrés Cortabitarte, na súa exposición dos informes durante a fase final do proceso.
Por parte de Apafas, o seu avogado, Javier González, criticou por "incomprensible" a decisión do fiscal de retirar a acusación contra Cortabitarte. "Somos conscientes da relevancia e as consecuencias que leva unha declaración dunha responsabilidade neste accidente para Adif, pero tan só entendemos esa decisión difícil dentro do ámbito de xerarquización que ampara á carreira fiscal", sinalou.
Pola súa banda, o letrado Manuel Alonso Ferrezuelo, que foi duro nas súas consideracións sobre a conduta do maquinista, cargou máis amplamente contra o ex responsable da Dirección de Seguridade na Circulación de Adif, Andrés Cortabitarte, presente este mércores tamén na sala.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.