Concentración en Monforte en repulsa das violacións de dous menores nas festas: "Fallou a sociedade"

Sobre un centenar de persoas protagonizaron este xoves unha concentración fronte ao Concello de Monforte de Lemos, na que participou o alcalde, José Tomé, para clamar contra as agresións sexuais a dous menores na madrugada do martes, durante as festas patronais do municipio, polas que dous novos (un deles, menor de idade) foron detidos.

A presidenta de Femforte, a asociación convocante da protesta, Olalla García Mariño, ten claro que o ocorrido non é algo puntual e que se enmarca nunha "cultura da violación" que os homes "maman desde que nacen". "E niso fallamos todos, fallou a sociedade", engade. García Mariño advirte que episodios como o ocorrido o martes en Monforte "afloran nunha maior intensidade" noutras partes da provincia, de acordo cos datos que rexistran os 'puntos violetas' despregados por distintos municipios.

Retratos robot achegados pola Garda Civil de Pontevedra | Fonte: GARDA CIVIL

Para a presidenta de Femforte, estes sucesos deben levar á sociedade a adoptar "medidas de autocuestionarse a propia cultura". E é que os menores xa teñen "normalizadas determinadas cousas", como ver pornografía ou consumir prostitución.

En definitiva, a concentración deste xoves non serviu para reivindicar "nada distinto" con respecto a episodios pasados. Neste sentido, a presidenta de Femforte lembra o caso dun octoxenario detido o pasado mes de febreiro, tamén en Monforte, por agredir sexualmente a unha menor co consentimento da súa nai. "Gustaríanos que nos tomásemos en serio o que está a pasar", conclúe García Mariño.

MANIFESTO

Durante a concentración ante o Concello, Femforte leu un manifesto que advertía como a violencia sexual cara á infancia e a adolescencia creceu "un 71 por cento nos últimos 10 anos". "E estes son os casos que se denuncian", agrega este texto. "Sen educación sexual e afectiva a pornografia convértese na maior fonte de información sobre sexualidade, polo que o desexo sexual créase sobre cimentos violentos, desiguais e ficticios", sinala. O manifesto cita datos alarmantes de Save the Children: o 12 % dos mozos reproducira algunha vez o que vira na pornografía, sen o consentimento explícito da parella e sen que a esta lle parecese ben.

"Estes son os datos e esta a segunda vez que nos concentramos para denunciar esta violencia. Hoxe por dous adolescentes de 15 e 16 anos. Non, isto non é casual. Non, isto non está a pasar en Monforte porque aquí os homes volvéronse máis agresivos. Esta violencia contra as mulleres esta aumentado en toda España, manifestándose de moitas formas, desde que políticos, medios de comunicación e redes sociais ridiculizan, negan, ocultan e tentan eliminar políticas que nos protexen", asevera.