A vendima de 2023, "case a mellor da historia"
Alcanza os 75,4 millóns de quilos, a maior nunha década. Rías Baixas rexistra a súa marca histórica, con 44,3 millóns de quilos
Por Europa Press / Redacción | Compostela | 05/10/2023 | Actualizada ás 18:05
A vendima de 2023 en Galicia rexistra un total de 75,4 millóns de quilos de uva, o que supón cinco millóns de quilos máis que en 2022 (+7%). Trátase da maior nunha década e aproxímase á máis alta da historia.
Segundo datos da Consellería de Medio Rural, 66,3 millóns do total son uvas de variedade branca e 9,1 millóns restantes son tintas. Este nivel é o máis abundante do decenio 2014-2023, de forma que se supera este ano nun 18% a media deste decenio. As cinco denominacións de orixe anótanse un incremento de produción respecto de 2022, incluída Ribeira Sacra que aínda non ten pechados os datos definitivos.
Rías Baixas chegou a 44,3 millóns de quilos uvas, un 8% máis que o ano anterior, marca na súa historia. O albariño supón o 97% da súa produción. Esta cifra é un 22% maior que a media da década. Séguelle: Ribeiro (11,5 millóns, un 12% máis), Ribeira Sacra (5,2 millóns, cos traballos por terminar), Valdeorras (7,8 millóns, un 20% máis) e Monterrei (6,6 millóns, un 2% máis).
