A compravenda de vivendas en Galicia frena a súa caída en agosto ata o 12,3 %, con 1.692 operacións
Por Europa Press / Redacción | SANTIAGO DE COMPOSTELA | 24/10/2023 | Actualizada ás 10:17
A compravenda de vivendas en Galicia rexistrou en agosto un descenso do 12,3 % con respecto ao mesmo mes de 2022, con 1.692 operacións, nun contexto de tipos de interese máis elevados para conter a inflación, segundo informou este martes o Instituto Nacional de Estatística (INE).
Esta caída supón unha baixada inferior á rexistrada en xullo, xa que nese mes esborrallouse un 22,8 % a compravenda de vivendas na Comunidade, sempre segundo datos do INE. En total, en Galicia transmitíronse 3.267 vivendas, das cales 1.692 foron por compravenda, mentres que 25 foron doazóns, unha permuta, 1.822 foron herdanzas e 1.876 outro tipo de transmisións.
Das 1.692 vivendas compradas, máis do 97 % era vivenda libre. Ademais, un 76 % era vivenda usada. En Galicia transmitíronse ata 8.471 leiras, un 1,7 % menos que en agosto do ano pasado. Delas, 2.604 eran leiras rústicas e o resto, urbanas.
DATOS NACIONAIS
A nivel nacional, a compravenda de vivendas rexistrou en agosto unha caída do 14,4 %, ata un total de 49.252 operacións, a súa cifra máis baixa neste mes desde 2020, segundo o INE. Con este retroceso interanual, que amplía en case catro puntos o rexistrado en xullo (- 10,5 %), a compravenda de vivendas encadea sete meses de taxas interanuais negativas.
O descenso da compravenda de vivendas en agosto debeuse á caída tanto das operacións sobre pisos de segunda man como ás realizadas sobre vivendas novas. En concreto, a compravenda de vivendas usadas baixou un 15,9 % no oitavo mes do ano, ata sumar 39.827 operacións, mentres que as transaccións realizadas sobre pisos novos diminuíron un 7,3 %, ata as 9.425 operacións.
