Traballadoras das escolas infantís maniféstanse por salarios "dignos": "Non pode ser, educar sen chegar a fin de mes"

As traballadoras das escolas infantís privadas saíron este sábado ás rúas da capital galega para manifestarse en contra do bloqueo das negociacións coa patronal a nivel nacional, á que lle reclaman "un convenio e uns salarios dignos".

A manifestación saíu da Alameda ás 11,30 horas e percorreu as rúas compostelás ata chegar á Praza de Pratarías. Nela participou toda a comunidade educativa, así como as familias e o alumnado, e escoitáronse consignas como "sector feminizado, sector precarizado" e "non pode ser, educar aos vosos fillos sen chegar a fin de mes".

O conflito das traballadoras do sector educativo privado continúa intensificándose, de face a presionar á patronal para que acepte as propostas de representación laboral das traballadoras, que están a cobrar salarios por baixo do Salario Mínimo Interprofesional, segundo trasladou CIG Ensino. Unha das reclamacións que mantivo CIG Ensino é que o novo convenio, que leva máis dun ano e medio bloqueado por "negociacións estériles", recolla salarios dignos.

Así mesmo, denuncian que a patronal propuxo nas últimas reunións realizadas salarios máis baixos que os que fixara hai xa un ano, pasando de 1.660 euros para a categoría de mestra a 1.611,10 euros. O mesmo ocorreu coa categoría de educadora, que pasou de 1.360 euros a 1.236 euros, e o resto de categorías pasan de 1.245 euros a 1.116 euros, sinalan os sindicatos.

CIG Ensino apunta que tamén hai retrocesos noutros dereitos laborais con respecto ás primeiras propostas, o que fai que as traballadoras das escolas infantís consideren "unha burla e un insulto" que se manteña bloqueada a negociación "coa intención de prolongar a súa precariedade".

Este luns 18 terá lugar unha negociación coa patronal, da que esperan avances, que de non producirse, levarán a unha nova xornada de folga, a sexta no que vai de ano, para o martes 19, día no que tamén están previstas manifestacións en Vigo e A Coruña.

As traballadoras das escolas infantís de Santiago de Compostela manifestándose por un convenio e uns salarios dignos.. NIV | Fonte: Europa Press