Rajoy apela a "non perder nin un voto" para evitar que Galicia sexa gobernada por "un Frankenstein"
O ex presidente do Goberno cargou contra Yolanda Díaz e contra Ana Pontón e fixo un chamamento á "militancia comprometida".
Por Europa Press / Redacción | A MARIÑA | 15/02/2024 | Actualizada ás 18:14
O presidente de honra do PPdeG, Mariano Rajoy, pediu este xoves en Alfoz (Lugo) aos simpatizantes do seu partido que "non se perda nin un só voto" nas eleccións autonómicas do domingo para evitar que Galicia sexa gobernada por "un Frankenstein" como o que goberna en Madrid e no que está presente, dixo en ton irónico, "o mellor de cada casa".
As declaracións do ex presidente do Goberno tiveron lugar no marco dunha multitudinaria comida-mitin celebrada na leira Galea do municipio de Alfoz, na comarca da Mariña central, na que estivo acompañado pola secretaria xeral do partido, Paula Prado, e a cabeza de lista do PP pola provincia de Lugo, Elena Candia.
Tras realizar un repaso aos resultados das últimas eleccións municipais e xerais --e subliñar que o PP perdeu a Deputación de Lugo "por 300 votos" e quedou "a catro escanos" de lograr a maioría absoluta para Feijóo--, Rajoy fixo un chamamento á "militancia comprometida" do PP, que está sempre "ás duras e ás maduras", a acudir o domingo ás urnas.
"Todos os votos son imprescindibles. Se gañamos, Galicia seguirá tendo un gran presidente, sensato, tranquilo e con experiencia sobrada, e un Goberno estable, forte e unido", proclamou Mariano Rajoy en referencia á candidatura de Alfonso Rueda, para acto seguido agregar que o PP é "a única referencia de sensatez" que queda en España. "Se non perdemos nin un voto e non nos confiamos, Galicia terá garantía de tranquilidade, estabilidade e acougo", insistiu.
De non conquistar a maioría absoluta nos comicios autonómicos, alertou o ex presidente do Goberno, Galicia vivirá os próximos catro anos dirixido por "un Frankenstein", reiterou, que a comunidade autónoma "non merece": "Non somos tan mala xente. Galicia non merece un Frankenstein como o que hai en España. A cuestión é fácil. O PP ou o Frankenstein", indicou.
CRÍTICAS A YOLANDA DÍAZ E BNG
Para ilustrar os perigos dun hipotético goberno de coalición en Galicia tras os comicios do 18F, Mariano Rajoy cargou contra a traxectoria da vicepresidenta segunda do Goberno e líder de Sumar, Yolanda Díaz, á que acusou de "destruír" a todos os grupos políticos dos que formou parte. "Logrou esnaquizar o Partido Comunista, pasouse a EU, perseverou e tamén logrou esnaquizar a EU. Logo veu por aquí e montou En Marea. E logo marchou a Podemos, pero como non descansa nunca, tamén logrou esnaquizar a Podemos. Que queda agora por facer?", esgrimiu o presidente de honra do PPdeG.
Tras compartir a súa visión sobre a traxectoria de Díaz, foi a quenda do BNG, partido ao que Rajoy acusou de pretender botar "á Policía Nacional e á Garda Civil" de Galicia, de tratar de conseguir que o "Tribunal Constitucional non poida actuar" na comunidade e de pretender "liquidar as provincias". "Pontón preséntase ao electorado coma se fose Teresa de Calcuta pero vai nunha lista con ERC e Bildu, que é directa e sinxelamente a ETA", proseguiu Mariano Rajoy.
Antes de concluír a súa intervención solicitando novamente ao electorado do PP o voto para Rueda, o ex presidente do Goberno chamou aos votantes a tratar de impedir cos seus sufraxios que se replique en Galicia un goberno "inestable, conflitivo e pelexado" como o que, na súa opinión, goberna hoxe en España. "Hai que evitar un goberno como o goberno do disparate, o goberno do si é si onde os violadores ven rebaixadas as súas penas e o goberno que dá impunidade a quen pasan por encima da constitución", finalizou.
