XIV edición do Festival Internacional de Xardíns de Allariz

Baixo o tema central "O xardín é unha obra de arte", o Festival, que poderá ser visitado ata finais de outubro, alberga doce xardíns efémeros seleccionados entre case corenta propostas recibidas dende diferentes puntos da xeografía mundial. Nove xardíns entran en concurso a través da votación do público que visita anualmente o recinto e os outros tres serán: os xardíns gañadores do ano pasado --o colombiano Xardín Informal e o madrileño Xeometrías do Nilo respectivamente--, ademais do xardín deseñado polo alumnado do IES de Allariz.

Paisaxistas galegos, madrileños, ecuatorianos, portugueses e austríacos participan nesta edición na que os visitantes poderán gozar de espazos dedicados a diferentes estilos artísticos. Haberá dende xardíns impresionistas ata un xardín dedicado a danza, así como o característico arte pop.

O Festival Internacional de Xardíns de Allariz converteuse nunha cita consolidada no panorama paisaxístico e referente a nivel estatal por ser o único con estas características, polo que pasan, de maio a outubro, preto de 40.000 visitantes.