O mercado do automóbil cae en Galicia no mes de abril, mentres sobe en España; por que?

Galicia rexistrou 2.221 matriculacións en abril de 2025, un 2,8 % menos que no mesmo mes de 2024, segundo os datos das asociacións de fabricantes (Anfac), concesionarios (Faconauto) e vendedores (Ganvam) publicados este luns. Este descenso de compra de coches novos contrasta co incremento do 7 % na media española, onde se alcanzaron as 98.522 unidades en abril. O tirón dos coches eléctricos (+67,6 % e 456 unidades) e híbridos (+4,7 % e 983 vehículos) non é suficiente para paliar a caída de vendas de automóbiles novos de combustible. No conxunto do que vai de ano, entre xaneiro e abril, as matriculacións baixan un 3,6 % na comunidade galega, cun total de 8.734 unidades. Contrasta co avance superior ao 12 % no conxunto do país.

DATOS ESTATAIS

As matriculacións de turismos e todoterreos en España alcanzaron as 98.522 unidades en abril, o que representa unha alza do 7,08 % respecto das 92.005 rexistradas no cuarto mes de 2024, segundo os datos das asociacións de fabricantes (Anfac), concesionarios (Faconauto) e vendedores (Ganvam), publicados este luns. Anfac sinala que, pesar de contar coa Semana Santa no mes de abril, a diferenza do ano pasado que foi a finais de marzo, o mercado seguiu o seu bo comportamento, encadeando o seu xa oitavo mes de crecemento.

Polo que, tanto as vendas dos vehículos da zona afectada pola Dana, que se viron beneficiados polo plan Reinicia Auto+ como o aumento do mercado electrificado tras a confirmación do Plan Moves III permitiron esta mellora respecto ao ano anterior, afirma a patronal. Nos primeiros catro meses do ano, as matriculacións de turismos e todoterreos xa suman 377.889 unidades, un 12,2 % máis que no mesmo período de 2024.

Por canles, os clientes particulares adquiriron 39.669 turismos e todoterreos en abril, un 5,6 % máis en termos interanuais, mentres que as empresas matricularon 30.707 unidades no cuarto mes do ano (+5,1 %). Do seu lado, as firmas de 'rent a car' adquiriron 28.146 turismos e todoterreos no mercado nacional en abril de 2025, o que supón un 11,5 % máis en termos interanuais. Nestes catro meses de 2025, a canle de particulares creceu un 14,9 % en matriculacións, ata as 162.277 unidades, mentres que o de empresas fíxoo un 7,3 % ata as 121.503 unidades. Os 'rent a car', pola súa banda, matricularon 94.109 turismos, o que significa un 14,2 % máis anual.

Doutra banda, o 'renting' matriculou en abril deste ano 22.433 turismos, un 18,3 % menos fronte aos 27.535 coches que comercializou no mesmo mes de 2024. No que vai de ano, o renting matricula un 3 % menos, ata os 90.968 turismos. Ademais, as matriculacións de vehículos comerciais lixeiros alcanzaron en abril as 15.904 unidades, o que supón unha alza do 1,3 % respecto ao mesmo mes do ano pasado. No catro meses que van de ano crecen un 9,2 %, ata as 58.456 unidades. Por tipoloxía, os derivados, furgonetas e 'pickup' caeron un 4,6 % interanual no cuarto mes de 2025, ata as 7.982 unidades.

Mentres, os furgóns e camións con chasis lixeiros alcanzaron en abril as 7.922 matriculacións, unha alza do 8,1 % en termos interanuais. Nos primeiros catro meses, os derivados, furgonetas e 'pickup' creceron un 13,6 %, ata as 31.109 unidades e os furgóns e camións con chasis lixeiros fixérono un 4,6 %, ata as 27.347 unidades. As emisións medias de CO2 dos turismos vendidos en abril volven caer ata os 108,1 gramos de CO2 por quilómetro percorrido, un 9,1 % inferior que a media de emisións dos turismos novos vendidos no mesmo mes de 2024. No acumulado de 2025, as emisións medias sitúanse en 110,2 %, un 6,2 % menos que no primeiro cuadrimestre de 2024.

OS ELÉCTRICOS CRECEN UN 80 %, MENTRES O COMBUSTIBLE DECLINA

En canto ás vendas por tipos de combustible, os turismos electrificados (BEV+PHEV) rexístranse 15.957 novas unidades, cun aumento do 79 % en abril. No total do mes, os electrificados supoñen o 16,2 % das vendas, 6,5 puntos porcentuais máis que abril do ano anterior. No total do ano xa se suman 55.701 vendas de eléctricos puros e híbridos enchufables, un 54 % máis que en 2024, representando o 14,7 % do mercado total.

Así, en concreto, o mes pasado, as vendas dos turismos eléctricos de batería (BEV, E-REV, FCEV) subiron un 78 % respecto ao mesmo mes do ano anterior, con 6.835 matriculacións deste tipo de coches. Esta cifra supón o 6,9 % do mercado total, e mantense como a cuarta motorización de vehículos no cuarto mes do ano, detrás dos híbridos enchufables. Nos catro meses que van de ano os eléctricos crecen un 71,2 %, ata as 26.060 unidades.

Do seu lado, as vendas de híbridos enchufables (PHEV) dispáranse un 80,3 % en termos interanuais, con 9.122 unidades matriculadas e cunha cota do 9,3 %, quedando como a cuarta motorización do mes. Nos primeiros catro meses do ano, os híbridos enchufables crecen un 42,8 % anual, ata as 29.641 unidades.

Os vehículos de combustión continúan a súa tendencia á baixa, e no caso dos de gasolina caen en matriculacións en abril un 20,4 % interanual, con 31.993 unidades, aínda que reteñen unha cota de mercado do 32,5 %, seguindo como a segunda motorización o mes pasado en España. Os coches desta motorización tamén caen un 12,7 % en termos interanuais no catro meses que van de 2025 e contabilizan 119.764 unidades matriculadas.

O diésel, do seu lado, esborrállase en abril deste ano un 38,2 %, ata as 5.555 unidades matriculadas, e queda cunha cota de mercado do 5,6 % situándose como a sexta motorización no cuarto mes do ano, detrás dos coches de gas. No cuadrimestre, os coches de diésel caen un 34,4 % anual, ata as 21.830 unidades. Así, a primeira tecnoloxía en abril en España desde inicio de ano, son os híbridos eléctricos non enchufables (HEV), con 40.736 unidades comercializadas, o que representa un aumento do 33,6 % respecto ao cuarto mes de 2024 e unha cota do 41,3 %.

Os híbridos non echufables tamén continúan a súa alza no que vai de ano subindo un 35,8 % anual as súas matriculacións, ata as 162.291 unidades. As matriculacións de vehículos de gas sóbense 24,9 % en termos interanuais, ata as 4.281 unidades, co que conseguen unha cota de mercado do 4,3 %. Así mesmo, os coches que utilizan gas matriculan 18.303 unidades no catro meses que van do ano, un 69,4 % máis que no mesmo período do ano pasado.

AS VENDAS DE VEHÍCULOS INDUSTRIAIS E AUTOBUSES CAEN UN 23,6 %

Por último, os datos das asociacións da automoción en España reflicten que en abril as matriculacións de vehículos industriais, autobuses, autocares e microbuses caeron un 23,6 %, cun total 2.567 unidades. Nos catro meses de 2025 os vehículos industriais, autobuses, autocares e microbuses tamén caen un 14,3 % en termos interanuais, ata as 10.702 unidades. Por tipoloxía, os vehículos industriais rexistran unha caída do 25,4 % interanual en matriculacións no cuarto mes do ano, con 2.150 unidades, mentres que os autobuses, autocares e microbuses, con 417 vendas ao cuarto mes de 2025, rexistran unha caída do 13,3 %.

OUTRO MES QUE PECHA EN POSITIVO, SEN REPERCUSIÓN POLO APAGAMENTO

Segundo o director de comunicación de Anfac, Félix García, "o mercado encadea xa oito meses consecutivos á alza que, a día de hoxe, permítennos ser optimistas en volver superar o millón de unidades vendidas este ano. O gran apagamento non tivo repercusión no mercado, xa que as unidades que non se matricularon ese día realizáronse en días posteriores".

Coches usados | Fonte: GANVAM - Arquivo