As empresas que empreguen o galego contarán cun selo que as beneficiará á hora de acceder a axudas e contratos públicos

O conselleiro de Cultura, Lingua e Xuventude, José López Campos, anunciou a creación dun selo para impulsar o uso do galego no ámbito socioeconómico. Así o avanzou este martes no Parlamento de Galicia, onde compareceu a petición propia no Pleno para informar sobre a folla de ruta do seu departamento para os próximos meses. O responsable autonómico explicou que as empresas comprometidas co galego terán "vantaxes" na concesión de axudas e nos procedementos do Executivo autonómico. O selo terase en conta nas convocatorias e, ademais, servirá como criterio de desempate. Esta medida, apuntou, súmase ás xa postas en marcha como os cursos para estranxeiros ou para o persoal sanitario.

Aproveitando a proximidade da celebración do Día das Letras Galegas, insistiu na importancia de alcanzar "un gran pacto de país" que permita traballar "en favor do galego desde a concordia e a liberdade". "Vivimos nun modelo de respecto e convivencia no que a lingua non é un problema, senón a chave que nos abre a porta cara a unha Galicia mellor", sinalou, defendendo a renovación do Plan xeral de normalización dá lingua galega "a través do diálogo e coa participación de todos os grupos". "A man do Goberno segue estando tendida en busca de pacto e de acordo, cun único obxectivo: un futuro prometedor para o galego", afirmou, en referencia á "negativa" do BNG a participar no debate.

Para continuar apoiando a un sector "sólido e de calidade", López Campos comentou tamén que seguirán a liña dos obxectivos marcados na Lei de cultura inclusiva e accesible de Galicia, para pór en marcha o Plan de modernización das infraestruturas culturais en todo o territorio que permita modernizar os recursos e "situar a Galicia na vangarda dos equipamentos". Un plan que deseñarán en colaboración coas administracións locais e para o que iniciarán unha auditoría que permita coñecer o estado actual das mesmas.

No marco das industrias culturais, López Campos anunciou que se ampliará o apoio a outros sectores artísticos como o dos videoxogos, artes escénicas ou música con convocatorias para apoiar a creación de novos proxectos, "o fomento da visibilidade de todas as disciplinas ou a elaboración, este mesmo ano, do primeiro Plan Estratéxico da Industria Musical en Galicia". Outra das accións de máis relevancia é a candidatura da Ribeira Sacra a Patrimonio da Humanidade, que será avaliada polo Comité Mundial da Unesco en 2026. Sobre isto, informou de que a candidatura, "a única que presenta España", xa está na fase final.

PLAN ESTRATÉXICO DA XUVENTUDE

Por outra banda, López Campos tamén quixo pór o foco nos mozos. Tal e como explicou, en virtude do Plan estratéxico da xuventude aprobado recentemente polo Consello da Xunta, que mobilizará máis de 700 millóns de euros, levarán a cabo medidas transversais con incidencia en distintas áreas do Goberno para "favorecer aspectos como a emancipación e o emprego xuvenil". Respecto da vivenda, reivindicou o Bono Emancípate, unha medida "pioneira a nivel nacional" e destinada exclusivamente aos mozos que queren dar o paso cara á vida adulta comprando ou alugando unha vivenda. En total recibíronse máis de 3.700 solicitudes, das que case 2.300 eran para mozas en réxime de aluguer, mentres que as restantes correspóndense con propietarias.

Lembrou ademais que esta medida ven sumarse a outras impulsadas desde o Executivo galego con incidencia na emancipación xuvenil, como son os aloxamentos compartidos en aluguer accesible que se construirán en diferentes cidades galegas ou a creación de 500 novas prazas en residencias xuvenís mediante a construción de catro novos centros públicos nas cidades onde non existen. En canto ao acceso ao mundo laboral, avanzou que se reforzarán programas como o Xuventude Mentoring, que conta cunha porcentaxe de inserción laboral superior ao 60 %, e axudas como as destinadas á obtención do carné de conducir que se convocarán nos próximos meses".

O conselleiro de Cultura, Lingua e Xuventude, José López Campos | Fonte: ANA VARELA - Arquivo

OPOSICIÓN

Aínda que o deputado de Democracia Ourensana, Armando Ojea, mostrou o seu interese na actualización do nomenclátor, tanto BNG como PSdeG centraron as súas roldas de intervención en críticas á Xunta polo novo Pacto pola Lingua. Así, a deputada socialista Silvia Longueira reclamoulle ao conselleiro que "deixe de utilizar a lingua como ferramenta política" e acepte a "man tendida" dos socialistas para facer da lingua "unha cuestión de Estado", emprazándoo a derrogar o Decreto do Plurilingüismo.

Criticou a "estratexia de anuncios grandilocuentes" da Xunta. "A cultura non é cuestión de blockbusters, non vivimos nunha festa permanente", aseverou, afeándolle que se esquezan das entidades de base que "dan servizo no territorio" aínda que "non sexan o Gaiás". Pola súa banda, a deputada nacionalista Mercedes Queixas enumerou algunhas as iniciativas das que, segundo dixo, non houbo máis noticias. "Este foi o ano do apagamento das súas propias ideas", lamentou, tras o que recoñeceu que si cumpriron coa Lei de cultura inclusiva, aínda que "resesa da lexislatura anterior e sen diálogo co sector".

Respecto ao Pacto pola Lingua, Queixas acusou á Xunta de ser un Goberno "desleal e antigalego" nun momento "dramático de emerxencia lingüística". "Porque mentres vostede fala dun pacto pola lingua, o presidente Rueda manda pisar o acelerador do seu particular pacto contra o galego. Lexislando na súa contra nesta Cámara", aseverou, en referencia á nova lei da CRTVG.