O Concello de Ourense condenado a pagar 130.000 euros a tres bombeiros por horas extra non recoñecidas
O persoal calcula que cada bombeiro realiza ao redor de 375 horas extras anuais sen cobrar.
Por Europa Press / Redacción | OURENSE | 22/05/2025 | Actualizada ás 19:31
O Xulgado Contencioso-Administrativo número 1 de Ourense condenou ao Concello de Ourense a abonar máis de 130.000 euros, máis intereses e costas, a tres bombeiros por horas extras realizadas e non remuneradas durante os últimos anos. A sentenza recoñece o dereito destes traballadores a cobrar o exceso horario acumulado desde 2017, o que supón un novo revés xudicial para o goberno local, que se negou a recoñecer estas cantidades.
Segundo as sentenzas notificadas esta semana, o Concello deberá pagar 52.559 euros a un bombeiro polas horas extras desde 2017 ata 2024, 31.609 euros a outro desde 2019 e 50.948 euros a un terceiro polo mesmo período, todo iso sen que o Concello recorrese, tras o informe desfavorable da Avogacía Consistorial. As reclamacións baséanse nunha acumulación de máis de 1.642 horas extras anuais nalgúns casos, que o consistorio local rexeitara alegando prescrición, argumento desestimado pola xuíza.
Este fallo prodúcese nun contexto de conflito laboral entre o corpo de bombeiros e o Concello de Ourense, marcado por débedas que ascenden a 4,2 millóns de euros en concepto de horas extras, pluses impagados e outros complementos, segundo denuncia Comisiones Obreras. O persoal calcula que cada bombeiro realiza ao redor de 375 horas extras anuais sen cobrar.
QUENDAS
A tensión entre bombeiros e Concello agravouse nas últimas semanas pola intención do goberno municipal de modificar as quendas laborais, pasando de gardas de 24 horas seguidas a quendas de 12 horas, medida que o corpo considera unha imposición sen negociación e pola súa intención de pasar a contar cun sistema de voluntariado. Ademais, denuncian que persisten a falta de pagamentos de complementos recoñecidos en sentenzas anteriores, como nocturnidades e festivos, o que xerou protestas e pintadas no parque de bombeiros.
O alcalde, Gonzalo Pérez Jácome, e o concelleiro de Seguridade Cidadá, José Ignacio González, defenden que o novo modelo de quendas é máis eficiente e rendible para as arcas municipais, pero o persoal mantén o seu rexeitamento e esixe o cumprimento íntegro das sentenzas xudiciais e o pago de todas as cantidades debidas.
