O soldo medio dun electricista foi de 62.000 euros ao ano en 2023, fronte aos 16.777 na hostalaría
O custo laboral sobe un 5,4% en Galicia en 2024: o nivel máis elevado desde 2008, pero 3.667 euros menos que a media
Por Europa Press / Redacción | SANTIAGO DE COMPOSTELA | 22/07/2025 | Actualizada ás 12:35
O custo total neto por traballador en Galicia foi de 33.641,53 euros en 2024, un 5,4% máis que en 2023, segundo os datos que publica o Instituto Nacional de Estatística (INE) este martes. Supón o nivel máis elevado na serie publicada desde 2008. Este incremento é o terceiro maior por comunidades, só por detrás de Estremadura (+8,2%) e Murcia (+5,6%). A alza de Galicia é máis dun punto superior ao 3,9% de avance na media española.
No entanto, o dato galego é 3.667,4 euros inferior á media do país de 37.308,93 euros de custo por traballador. Lidera a clasificación Madrid con 44.458,06 euros, case 11.000 euros máis que Galicia, que ocupa o décimo lugar entre comunidades.
Por sectores, a industria é a de maior custo laboral en Galicia (40.677,99 euros), seguida por construción (35.668,82 euros) e sector servizos (32.173,50 euros). Do total do custo laboral, 24.665,63 euros correspóndense co custo salarial en Galicia en 2024, un 5,3% máis que en 2023, preto de 3.000 euros menos que a media española de 27.558,68 euros, que sobe un 3,8%.
DATOS ESTATAIS
O salario bruto anual por traballador alcanzou os 27.558,68 euros en 2024, o que supón un aumento do 3,8% respecto ao ano anterior, e situouse no seu nivel máis elevado desde o inicio da serie, en 2008, segundo os resultados da Enquisa Anual de Custo Laboral (EACL), publicada este martes polo Instituto Nacional de Estatística (INE).
SOLDO DE 62.105,02 EUROS EN EMPRESAS DE SUBMINISTRACIÓN DE ELECTRICIDADE
As diferenzas entre o custo laboral por traballador segundo as distintas actividades da clasificación foron notables, oscilando desde os 23.138,9 euros anuais brutos por traballador na hostalaría, ata os 82.147,9 euros por asalariado en empresas de subministración de enerxía eléctrica, gas, vapor e aire acondicionado.
En canto ao salario medio nas empresas de subministración de electricidade, e gas, o INE indica que se situou en 62.105,02 euros brutos por traballador en 2024, mentres que na hostalaría foi de 16.777,32 euros.
Nas empresas vinculadas a actividades financeiras e de seguros, o salario bruto medio foi de 54.169,76 euros, mentres que nas compañías de actividades administrativas e servizos auxiliares foi de 18.810,24 euros.
