Reaccións: A CIG denuncia "caótica xestión" da Xunta en materia de persoal de extinción de incendios

A CIG denunciou a “caótica xestión” da Xunta respecto ao persoal do Servizo de Prevención e Defensa contra Incendios Forestais (SPIF), destacando que aínda non se coñecen as vacantes por cubrir nin os criterios de cobertura das mesmas. A secretaria nacional do sector Autonómica de CIG-Administración, Zeltia Burgos, criticou que as prazas non se cubren con antelación á campaña, impedindo que os profesionais se formen e coñezan a operativa do dispositivo. O último chamamento de persoal foi o pasado 15 de agosto, cando se cubriron 198 baixas, sen que se saiba cando xurdiron nin por que non se cubriron antes.

A central sindical alertou de que moitas das persoas chamadas para cubrir estas vacantes carecen de experiencia en lumes forestais, entrando nun dispositivo xa “desbordado, colapsado e con persoal esgotado”, o que incrementa a presión psicolóxica e o risco ante a magnitude dos incendios. Burgos sinalou que esta situación podería evitarse se a Consellería cubrise as prazas vacantes con antelación, tal como recomendaban o persoal experto e a representación sindical, dado que se anticipaba unha campaña especialmente complicada.

Ademais, a CIG reclamou unha planificación máis eficiente, co axuste de quendas e a posibilidade de que o persoal desprazado pase a noite nas zonas afectadas para descansar entre servizos. A central tamén esixe que a substitución de persoal, o avituallamento e a reparación de equipos danados se fagan de forma organizada, lembrando que a falla de EPIs e equipos en condicións de uso aumenta os riscos. Segundo Burgos, despois de 15 días de vaga de incendios, a planificación e previsión continúan sendo “nulas”.

"FALTA DE MEDIOS E DESCOORDINACIÓN"

A portavoz nacional do BNG, Ana Pontón, visitou este luns as zonas máis afectadas polos incendios en Ourense, especialmente no concello da Mezquita, e cualificou a situación de "crítica e dramática". Esixiu todos os recursos dispoñibles para frear "unha das maiores catástrofes da historia recente de Galicia" e denunciou que a Xunta está "desbordada e sen capacidade de anticipación", con falta de medios e descoordinación nos dispositivos de extinción.

Pontón trasladou o seu recoñecemento aos equipos de loita contra o lume e aos veciños implicados, e subliñou que esta traxedia debe supoñer un punto de inflexión para mellorar a política forestal, a ordenación do territorio e os plans de prevención. Ademais, reclamou abrir un debate sobre responsabilidades políticas tras a vaga de lumes, pero insistiu en que o urxente é mobilizar todos os medios para frear o avance das chamas.

LUÍS MENOR CRITICA A XESTIÓN DO GOBERNO ANTE OS INCENDIOS

A Deputación de Ourense asegurou que declarar o nivel 3 nos incendios da provincia "non é a solución" e reclamou ao Goberno Central que deixe de buscar escusas e achegue todos os medios necesarios. O presidente provincial, Luís Menor, explicou que non é labor da Xunta pedir esta medida, senón do Goberno cando se ven afectadas varias comunidades autónomas, lembrando que nesta ocasión son sete.

Menor criticou que o Executivo central non asuma a responsabilidade e sinalou que Galicia está preparada para xestionar a emerxencia, pero carece dos recursos necesarios. Sobre a visita do presidente Pedro Sánchez e do ministro Fernando Grande-Marlaska, destacou que os medios solicitados xa foron pedidos por escrito, e ironizou sobre a afirmación de Marlaska de que os recursos son suficientes, sinalando que probablemente "nunca estaría nun incendio".

O PP CRITICABA Á UME COMO UN "MALGASTO"

O secretario de Estado de relacións coas Cortes, Rafael Simancas, considera que, ao fío do labor dos militares da Unidade Militar de Emerxencias (UME) contra os incendios forestas, é bo momento para lembrar cando o PP vía esta unidade como un "capricho faraónico" e un "malgasto". Así o escribiu nunha mensaxe publicada na rede social X, xusto cando os dirixentes do PP enxalzan a actuación da UME contra o lume e mesmo reclaman ao Goberno máis efectivos militares.

"Hoxe é un bo día para lembrar cando o PP tachaba á UME de 'capricho faraónico de Zapatero' e 'malgasto', denunciando que os seus integrantes eran os 'mellor pagos' e pretendían mandalos a misións no exterior pola súa inutilidade en España", publicou o político socialista, recollendo noticias daquelas declaracións dos entón parlamentarios do PP na primeira lexislatura do Goberno Zapatero.