O Goberno presentará en setembro o plan de investimentos aeroportuarios para 2027-2031
O DOURA III podería superar os 5.000 millóns de euros, máis do dobre que o actual, para modernizar e ampliar os aeroportos españois.
Por Europa Press / Redacción | Santiago de Compostela | 04/09/2025 | Actualizada ás 14:24
O ministro de Transportes e Mobilidade Sustentable, Óscar Puente, anunciou este xoves que en setembro se desvelará a previsión de investimentos do Documento de Regulación Aeroportuaria (DOURA III), correspondente ao quinquenio 2027-2031. Puente destacou que se trata dun plan “moi importante” de mellora, consolidación, ampliación e modernización dos aeroportos españois.
O presidente de Aena, Maurici Lucena, avanzou que o DOURA III podería multiplicar por máis de dúas veces a cifra actual, superando os 5.000 millóns de euros totais e os 1.000 millóns anuais. O actual DOURA II (2022-2026) contempla 2.250 millóns en investimentos, e xa conta cun incremento extraordinario de 351 millóns aprobado polo Consello de Ministros para melloras de seguridade, ciberseguridade e adaptación normativa.
Lucena explicou que no DOURA III Aena proporá a expansión de hubs e grandes aeroportos turísticos, debido ao crecemento do tráfico aéreo que mantén numerosas instalacións ao límite da súa capacidade. Ademais, destacou que os novos investimentos serán clave para reforzar infraestruturas en aeroportos como os de Alicante, Valencia, Bilbao, Lanzarote, Eivissa, Málaga, Menorca e Tenerife, garantindo eficiencia e mellor experiencia para os pasaxeiros.
