Pontón chama a mobilizarse en Santiago pola defensa do monte galego

A portavoz nacional do BNG, Ana Pontón, chamou a participar na concentración convocada este domingo en Santiago de Compostela en defensa do monte galego e para demandar unha nova política forestal. “Hai que dicir alto e claro que queremos un monte limpo, multifuncional e con futuro”, reivindicou.

A mobilización está organizada pola plataforma Lumes Nunca Máis, que agrupa máis de 60 asociacións sociais, sindicais e ecoloxistas, e denunciará a recente vaga de incendios que, segundo os datos do satélite Copernicus, arrasou 143.000 hectáreas. Pontón aproveitou a súa intervención para criticar ao presidente autonómico, Alfonso Rueda, polo que cualificou como un “espectáculo lamentable” na súa comparecencia parlamentaria.

Segundo a líder nacionalista, Rueda actuou “con soberbia e prepotencia, sen a máis mínima autocrítica e minimizando o impacto do lume e as súas consecuencias”, algo que describiu como un “exercicio de irresponsabilidade e menosprezo sen precedentes”. Nesta liña, advertiu de que a política forestal do PP mantén a Galicia “en risco de volver arder” porque non aborda as causas estruturais dos incendios.

Como alternativa, Pontón destacou o plan integral do BNG Da cinza á vida, que será levado ao Parlamento galego. Entre as medidas propostas están ampliar a 100 metros as franxas de seguridade das vivendas, recuperar a superficie en mosaico con reforestación, incrementar e executar os fondos de prevención, estender a moratoria de plantación de eucalipto e revitalizar o medio rural.

Por último, preguntada polas declaracións do ministro de Transportes, Óscar Puente, sobre a suspensión de servizos ferroviarios durante os incendios de agosto, Pontón apuntou que se tratou dunha consecuencia da “xestión neglixente e incompetente do PP”. Engadiu, con todo, que Galicia “xa sofre as consecuencias da vaga de incendios” e que “non debe pagar custos engadidos ao Estado pola suspensión de ningún tipo de servizo”.