A CRTVG só dará voz no debate electoral a PP, PSdeG, BNG, En Marea e Ciudadanos
A Compañía de Radio e Televisión de Galicia emitirá o 12 de setembro o debate dos candidatos das "forzas significativas" que se presentan ás eleccións autonómicas.
Por Europa Press / Redacción | SANTIAGO DE COMPOSTELA | 25/08/2016 | Actualizada ás 11:59
A Compañía de Radio e Televisión de Galicia (CRTVG) ofrecerá un debate entre os cinco candidatos que optan á Presidencia da Xunta das "forzas significativas" que se presentan ás eleccións autonómicas do próximo 25 de setembro. O debate será emitido en directo e simultaneamente na Televisión de Galicia (TVG) e na Radio Galega (RG) o 12 de setembro, en horario de máxima audiencia.
Segundo trasladou este xoves a compañía, os chamados a participar neste encontro con "igualdade de tempo" son os aspirantes polo PPdeG, PSdeG, BNG, En Marea e Ciudadanos, formación, esta última, que non ten ningunha representación na Cámara galega.
Ao respecto, a CRTVG xustifica esta elección por tratarse das organizacións que xa obtiveron representación nas anteriores eleccións autonómicas e volven presentarse ou que, segundo o criterio da Xunta Electoral, teñen carácter de "forzas políticas significativas", deixando fóra a outras formacións minoritarias pero con aspiracións a obter representación no Parlamento galego.
Así mesmo, concretou que a cita terá lugar nos estudios da Televisión de Galicia en San Marcos, na capital galega, e convidou no mesmo escrito os representantes destes grupos a realizar un encontro de traballo previo para negociar os diversos aspectos do debate.
