Por Galicia Confidencial | Santiago de Compostela | 11/11/2016 | Actualizada ás 22:16
A inaguración, na que participarán o autor e o director de GC Xurxo Salgado, terá lugar o día 14 de novembro ás 19.00 h. A mostra estará no vestíbulo da bibliotecará até o 28 de novembro.
A exposición
A actualidade política, a emigración, o impacto da tecnoloxía nas relacións persoais ou a situación da lingua e a cultura popular galega son temas recorrentes do autor, que peneira a realidade con agudeza e humor. As súas viñetas de trazo limpo e moi persoais utilizan a retranca e os xogos de palabra como ferramentas fundamentais.
O autor
Xosé Manuel Fernández Montes (París, 1972) é asesor especializado en Propiedade Intelectual, mánager de artistas e creador de contidos de humor. Neste último eido cultiva a súa faceta de humorista gráfico en varios medios de Galicia como Novas do Eixo Atlántico ou os dixitais Noticias Valdeorras e Que Pasa na Costa. Dende hai cinco anos conta cunha sección de humor gráfico no xornal dixital Galicia Confidencial.
Non perdeu o contacto con Catalunya, terra na que estivo uns dezasete anos, pois segue colaborando na revista galego-catalá A Micro Pechado, e anos atrás foi colaborador da revista satírica A Retranca, do xornal Galicia Hoxe, A Peneira e o seu suplemento de humor gráfico O Farelo ou da revista deportiva Don Balón.
Antes desta mostra expuso en L´Hospitalet, Barcelona, Quiroga, Monforte e O Saviñao.