Miguel Santalices eloxia a figura da galega Isabel Zendal, considerada a primeira enfermeira en misión internacional

O presidente do Parlamento, Miguel Santalices, participou este venres en Ordes (A Coruña) na estrea do documental 'Isabel Zendal, a enfermeira que cambiou o rumbo do mundo', que rescata a figura desta galega, considerada pola OMS como a primeira enfermeira da historia en misión internacional.

Nacida en Santa Mariña de Parada, en Ordes, Isabel Zendal Gómez era, ata agora, a grande descoñecida da Real Expedición Filantrópica da Vacina, financiada polo rei Carlos IV e que zarpou do porto da Coruña en 1803 para levar a vacina da varíola a América e Asia.

Miguel Santalices destacou que as referencias a esta enfermeira eran "escasas" a pesar de que "ela foi a responsable directa do máis prezado daquela aventura: prestar todo tipo de coidados aos nenos que portaban a vacina nos seus propios corpos. Se eses coidados non fosen efectivos nada sería posible".

A OMS recoñece dende 1950 a Isabel Zendal como a primeira enfermeira da historia en misión internacional e o Premio Nacional de Enfermaría de México leva o seu nome, entre outros recoñecementos.

"INXUSTAMENTE IGNORADA"

Non obstante, en Galicia e en España, esta profesional foi inxustamente ignorada durante máis de dous séculos, xa que nin entón nin agora se recoñeceu o verdadeiro alcance de fazaña, única en mundo,", dixo Santalices.

Unha recente investigación do historiador e xornalista Antonio López Mariño sacou á luz moitas das incógnitas que rodeaban a traxectoria vital de Isabel Zendal e a última edición dos premios Enfermería en Desenvolvemento recoñeceu o labor desta muller a través dun premio recollido polo alcalde de Ordes.

Con actos como o deste venres pon "un chanzo na recuperación da figura histórica dunha das grandes heroinas" de Galicia, dixo Santalices, que lamentou que "con frecuencia" a sociedade se "enrede en discusións absurdas, enxalzando o negativo e enterrando no esquecemento feitos dignos da máxima consideración".

"Que Galicia ocupara, a través da figura de Isabel Zendal, un papel protagonista na historia de América, e tamén de Asia, constitúe un feito excepcional, digno de figurar en todos os libros de historia e, por suposto, débenos de encher de satisfacción como pobo", resolveu.