Por GC Tendencias | Viana do Bolo | 24/01/2017 | Actualizada ás 18:03
O Folión das Terras do Bolo empeza a quentar motores. Trátase dunha das variadas manifestacións do entroido que atopamos na provincia de Ourense onde a figura dos Boteiros gana especial protagonismo.
Dende hai tres anos, e xa case nas portas do entroido, celébrase en Viana e Vilariño de Conso a denominada Mascarada Ibérica, un encontro de carnavais tradicionais a nivel peninsular que está collendo gran relevancia sociocultural. Este ano celébrase a terceira edición e estarán representados os Folións da contorna pero tamén outras manifestacións entroideiras de Galicia ( Madamas e Galáns de Cobres, Xenerais do Ulla, Felos de Maceda, Troiteiros de Bande, Mázcaras de Manzaneda, Vellaróns de Riós, Galos de San Pedro da Mezquita, Entroido de Santiago de Arriba en Chantada…), de Zamora, Asturias, Cantabria e tamén de Portugal.
Segundo nos relata Secundino Fernández, alcalde de Viana, este gran encontro está organizado por unha comisión do entroido de Viana, no que están representados os diferentes folións (máis dunha ducia), a Asociación Xuntos polo Folión de Vilariño de Conso e este ano tamén pola Sociedade Antropolóxica Galega. Os respectivos concellos e a Asociación de mulleres rurais de Viana do Bolo colaboran tamén no evento.
Froito desta iniciativa e do éxito da mesma o pasado ano recibiron como recoñecemento á súa labor o “Premio Nacional de Antropología y Tradiciones Populares” da man da Sociedad Española de Antropología y Tradiciones Populares.
Así, pois, o día 28 o epicentro deste encontro de máscaras co gran desfile estará en Vilariño a partires das 16.30 h e o domingo 29 en Viana dende as 12.00 h. Secundino convídanos a vivir a experiencia e confírmanos que os dous concellos están listos e preparados para acoller a todos os grupos participantes e todos aqueles visitantes que se queiran achegar.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.