O desbordamento da balsa mineira de Touro chega a Bruxelas

A eurodeputada galega Lídia Senra vén de denunciar ante a Comisión Europea (CE) o desbordamento dunha balsa de residuos na parroquia de Bama, na mina de Touro. A parlamentaria rexistrou un escrito en Bruxelas no que informa dos danos ambientais que provocan as continuas verteduras que se producen na zona.

Senra considera que o desbordamento que tivo lugar o pasado día 15 da balsa de Bama, que está situada a só cen metros do río Brandelos, a onde foron parar os residuos, é xa "a gota que colma o vaso" e "un exemplo claro de vulneración" da Directiva 2006/21/CE referida á xestión dos residuos de industrias extractivas e da Directiva 2004/35/CE sobre responsabilidade e reparación de danos ambientais.

Ademais, Senra defende que tanto as empresas responsables daquela explotación mineira, como a Xunta de Galicia e o Goberno español están a vulnerar totalmente a Directiva Marco da Auga 2000/60/CE, por non facer nada ante a continua contaminación que padecen as canles fluviais da contorna, moitos regatos pequenos que van parar ao río Ulla, trasladándose a contaminación até a ría de Arousa.

“Estamos a falar dun problema que trascende o local, que vai moito máis alá de Touro e que contamina desde os pastos que hai a carón dos regatos de Touro até os bancos marisqueiros da costa”, dixo. “E ademais non é un problema puntual dun día. Eu mesma vin nunha visita realizada á zona no pasado outubro como ía o rego Pucheiras, por exemplo, tamén afluente do Ulla, no treito posterior á mina. Arriba da mina vai claro e vivo, abaixo da mina vai totalmente turbio e morto, e isto é a diario. Está á vista de calquera”, argumentou. 

Neste sentido, Senra pídelle á CE que "actúe dunha vez e adopte as medidas necesarias para comprobar se se está aplicando ben ou non a Normativa da Unión con respecto a esta situación, máxime cando por se non fose suficiente con este problema que se leva arrastrando décadas, está enriba da mesa un proxecto de nova explotación de mina de cobre a ceo aberto en Touro e O Pino por parte de Cobre San Rafel S.L. que de ir adiante ocuparía a barbaridade de 122 quilómetros cadrados", alertou a eurodeputada.

O escrito de Lídia Senra á CE non é o primeiro que esta eurodeputada presenta nas institucións comunitarias relativo a este tema. De feito, Senra xa informou no pleno do Parlamento Europeo, en Estrasburgo, en outubro, da vertedura continuada de residuos tóxicos que se podería estar levando a cabo na actualidade e sen ningún tipo de control nas instalacións da antiga mina.

Senra levou daquela ao hemiciclo europeo fotografías que amosaban o estado dos ríos e a zona, así como as escombreiras e balsas, que poderían estar sendo utilizadas, como asegura a veciñanza, para verter residuos, algúns deles tóxicos, sen tratamento previo e chegados de diferentes lugares da Galicia en camións. Nunha intervención no pleno, Senra pediu que se abrise canto antes unha investigación independente que inclúa a realización de analíticas tanto das augas dos ríos como das balsas e escombreiras.

Tamén en outubro rexistrou unha pregunta por escrito dirixida á CE na que informaba sobre o novo proxecto mineiro previsto para a zona e advertía que non sería compatible coa Directiva 2006/21/CE. Non obstante, daquela a CE considerou que debido a que as operacións de extracción do mineral aínda non comezaron porque o novo proxecto aínda non ten a concesión, resultaba prematuro avaliar se coa actividade da mina se vulneraría ou non a citada directiva relativa á xestión dos residuos de empresas extractivas.

Non obstante, na súa resposta, o comisario de Medio Ambiente europeo, Karmenu Vella, advertía: “Nos Estados membros recae a responsabilidade primaria de traspoñer e aplicar correctamente a lexislación da UE, así como de arbitrar medidas que garantan a protección xurídica efectiva nos ámbitos cubertos por dita lexislación. En caso de evidenciarse unha aplicación incorrecta do Dereito da Unión, a CE, na súa función de gardana dos Tratados, adoptará as medidas necesarias, que inclúen no seu caso, procedementos de infracción”.

Senra considera que o desbordamento da balsa a semana pasada é un "claro exemplo de vulneración das normativas europeas" e agarda por iso, que agora si a CE tome cartas no asunto. A Comisión debería respostar no prazo de entre catro e seis semanas á nova petición da eurodeputada galega.

ACTOS CONTRA A MINA

Continuando co apoio á loita da Plataforma Veciñal Mina Touro-O Pino NON, Lídia Senra participará este venres, 26 de febreiro, ás 20:30 horas na Estrada (Sala Abanca, rúa Calvo Sotelo), nun coloquio organizado pola propia plataforma, Móvete (Movemento Veciñal Estradense) e a Sociedade Galega de Historia Natural (SGHN). Baixo o título “A mina de Touro-O Pino tamén lle afecta á Estrada, no coidado do río Ulla”, intervirán como ponentes a propia Lídia Senra, a bióloga e membro da SGHN Aurora Puentes, a concelleira da Estrada Mar Blanco Casais, e representantes da Plataforma Minta Touro-O Pino NON.

Xa o domingo, Senra ten previsto tamén acudir á manifestación-tractorada que convoca a Plataforma e que partirá ás 12:00 horas da antiga balsa mineira de Angumil para rematar no Concello de Touro. A eurodeputada anima a toda a sociedade a participar dos actos e mobilizarse contra este proxecto para “paralo entre todas e todos”.