A Xunta destaca a aposta da industria forestal polas "condicións de traballo seguras"
Di que "avoga pola formación para promover condicións de traballo seguras".
Por Europa Press / Redacción | SANTIAGO DE COMPOSTELA | 15/02/2019 | Actualizada ás 14:54
O director da Axencia Galega da Industria Forestal (Xera), Ignacio Lema, destacou a difusión que a Consellería de Economía, Emprego e Industria, a través do Instituto de Seguridade e Saúde Laboral de Galicia (Issga), realiza sobre as medidas de prevención de riscos laborais de carácter sectorial, "adaptando as medidas xenéricas ás características propias de cada industria".
Así o sinalou Lema este venres en Santiago na xornada sobre as novas ferramentas para a prevención de riscos laborais na actividade forestal organizada polo Issga en colaboración coa Federación Empresarial de Serradoiros e Rematantes de Madeira de Galicia (Fearmaga).
Neste sentido, o director xeral da Xera lembrou que o grupo técnico de traballo para a industria forestal, formado pola Xunta, Fearmaga, Ence e Finsa, avalía as ferramentas necesarias para que, "coa suma de esforzos" e a colaboración da Administración co tecido empresarial e os axentes sociais, "se poida mellorar as condicións de seguridade e saúde laboral".
Lema indicou que esta mesa de traballo "avoga pola formación para promover condicións de traballo seguras", resaltando a importancia de que as empresas e os profesionais da industria "introduzan a prevención como elemento inherente a todos os procesos, tarefas e actividades".
Ademais, Lema subliñou a importancia da renovación da tecnoloxía forestal xa que "as novas máquinas teñen incorporados novos mecanismos de seguridade" e lembrou que a Xunta conta con axudas neste ámbito por un valor de 8,6 millóns de euros. "Calquera esforzo dirixido a mellorar o ámbito laboral é un esforzo que vai ter consecuencias positivas sobre os traballadores", sentenciou.
