Por Europa Press / Redacción | SANTIAGO DE COMPOSTELA | 28/02/2019 | Actualizada ás 19:49
Para esa xornada, día internacional da muller traballadora, hai previstas varias convocatorias de folga xeral con diversos tramos horarios, que afectarán a todas as actividades e centros de traballo, tanto empresas privadas como do sector público, con vínculo funcionarial, estatutario ou laboral.
Ante a "necesaria conciliación" entre o exercicio ao dereito de folga e o mantemento dos servizos "esenciais", segundo subliña a Xunta, a Administración autonómica fixou este xoves uns servizos mínimos "indispensables" que figuran no decreto.
Recollen, segundo apunta nunha nota de prensa emitida tras a reunión semanal do Goberno galego, os servizos esenciais no ámbito da Presidencia, Vicepresidencia e resto de consellerías. Non están incluídos nin o persoal sanitario nin o da CRTVG, sinala.
Desta forma, segundo explica, "establécense servizos mínimos respecto dos sectores e actividades cuxa regulación é competencia dalgunha das consellerías da Xunta e que poden afectar o desenvolvemento ordinario da actividade cidadá".
Cita, entre outros, sanidade, seguridade, protección civil, transportes e comunicacións, rexistros públicos, edificios, bens e instalacións públicas, asistencia social e educación, servizos de vixilancia e extinción de incendios, bombeiros, 112, xulgados de garda e de violencia de xénero, Sogama, servizos regulares de uso especial para transporte de escolares, para traballadores, para mercadorías e funerario.
DENUNCIA DO PSdG
Por outra banda, Noela Blanco, portavoz do grupo socialista na comisión de control da CRTVG, denunciou hoxe en comisión a “vulneración do dereito a folga a través de servizos mínimos abusivos” e pídelle ó director xeral da CRTVG “que tome medidas ante as reiteradas denuncias e a sentenza do TSXG”. Así mesmo pediu “que se escoiten as reivindicacións e se poña fin á persecución e amordazamento de xornalistas”.
A deputada socialista preguntoulle ó Director Xeral da CRTVG “por que non está tomando medidas ante as denuncias de servizos mínimos abusivos”. Blanco mostrou a súa perplexidade e lembrou que “xa existen sentenzas, lembremos a condea do TSXG á CRTVG trala folga feminista do 8 de Marzo por servizos mínimos abusivos”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.