O Consello de Ministros aproba cambios no modelo de negociación sobre os prezos do leite

O Consello de Ministros aprobou este venres, a proposta do Ministerio de Agricultura, Pesca e Alimentación, un Real Decreto polo que se establecen as condicións de contratación no sector lácteo e regúlase o recoñecemento das organizacións de produtores e das organizacións interprofesionais no sector. En concreto, con esta norma unifícase e actualízase a lexislación vixente nesta materia, adecuando o seu contido ás conclusións dos informes de institucións comunitarias e á experiencia adquirida, co obxectivo de reforzar o papel das organizacións de produtores na negociación dos contratos e mellorar a súa posición na cadea de valor.

Desta forma, Agricultura introduciu algunhas novidades en materia de contratación, organizacións de produtores e negociacións contractuais, ademais dunha nova declaración obrigatoria. No ámbito da contratación, concrétase de maneira máis detallada a necesidade de que os primeiros compradores presenten, con anterioridade á firma do contrato, unha oferta por escrito aos produtores. Ademais, regúlanse algúns novos requisitos do propio contrato, como é a obrigación de recoller no mesmo, en caso de darse, as diferentes condicións de prezos relacionadas con diferentes volumes ou a posibilidade de incluír cláusulas de repartición de valor no mesmo, mentres que se detallan as condicións para a formalización, subrogación e modificación dos contratos.

Na nova norma tamén se definen por primeira vez os termos que han de figurar nos estatutos das organizacións de produtores de leite. Así, requírese que consten neles, por exemplo, as normas que garantan aos produtores asociados, o control democrático da súa organización e a toma de decisións, así como as obrigacións derivadas da súa pertenza ás organizacións. Esta normativa integra e derroga a Orde Ministerial que regulaba o rexistro nacional de organizacións e asociacións de produtores de leite, que forma parte do sistema informático PROLAC, incorporando disposicións sobre a inscrición no citado rexistro de nova información sobre as organizacións de produtores e as súas asociacións, como é o caso dunha memoria de actividades.

CLARIFICA AS NEGOCIACIÓNS CONTRACTUAIS

Por outra banda, con este real decreto desenvólvense con máis detalle aspectos relacionados coas negociacións contractuais por parte das organizacións, clarificando as circunstancias nas que estas teñen lugar, así como as esixencias e consecuencias que leva para as partes negociadoras. En relación ao mandato de negociación, que deben dar os gandeiros ás organizacións de produtores que negocian os contratos lácteos, esíxese que inclúa o total da produción do produtor e teña unha duración mínima de dous anos prorrogables automaticamente.

Ademais, concrétase o sistema de infraccións e sancións, aclarando que é de aplicación a disposición adicional sétima da Lei 6/2015, de 12 de maio, de Denominacións de Orixe (DO) e Indicacións Xeográficas Protexidas (IGP) de ámbito territorial supra autonómico. Agricultura subliñou que para completar o exercicio de transparencia e equilibrar as esixencias no marco do paquete lácteo na cadea de valor, inclúese unha nova esixencia adicional, para o primeiro comprador, de declarar o volume de leite vendido ao seguinte elo da cadea e o seu prezo ao sistema unificado de información do sector lácteo (Infolac).