O PSdeG di a Feijóo que se quere que gobernen as listas máis votadas llo diga a Casado para facilitar a investidura de Sánchez
Os socialistas galegos contestan así a carta que lles enviou o presidente do PPdeG e da Xunta, pedíndolles que deixen gobernar en Galicia as candidaturas con máis votos que non acadan a maioría absoluta.
- Feijóo teima en afear ao PSOE que "non respecte" as listas gañadoras en Galicia, pero acepta que o PP o faga en Madrid
- O PP pide ao PSOE que gobernen as listas máis votadas en Galicia, ao contrario do que propón en Madrid
Por Europa Press / Redacción | SANTIAGO DE COMPOSTELA | 11/06/2019 | Actualizada ás 20:23
O secretario xeral dos socialistas galegos, Gonzalo Caballero, instou ao líder dos populares galegos, Alberto Núñez Feijóo, a mandar a carta na que o PPdeG pide ao PSdeG que permita os gobernos das listas máis votadas a Pablo Casado, para que facilite a investidura de Pedro Sánchez.
O xefe de filas dos socialistas galegos censurou a "inconsistencia" e o "cinismo político" de Feijóo que, segundo indicou, pasou de "aplaudir" o pacto do seu partido contra a ultradereita en Andalucía a reclamar uns meses despois que ten que gobernar o partido máis votado.
No día no que transcendeu un novo acordo do PP con Vox en Madrid "a pesar de que o PSOE gañou nesta comunidade", Gonzalo Caballero considerou que o PPdeG "se equivocou de destinatario" na carta que lle enviou.
"Se defenden que goberne o máis votado, debería mandarlla a Pablo Casado para que facilite a investidura de Sánchez", manifestou o secretario xeral do PSdeG, que considerou que este tipo de misivas teñen máis que ver coa "desorientación" dun PP que "quedou derrotado e en fóra de xogo" no escenario urbano galego.
Así mesmo, tras subliñar que o PSdeG construirá gobernos de progreso alí onde sexa posible, Caballero remarcou que a mensaxe dos electores "foi clara" nas principais cidades de Galicia, ao outorgar a confianza maioritaria ás forzas de esquerdas.
PACTOS DE GOBERNO
Así, sinalou que o PSdeG ten "a lexitimidade de liderar os gobernos municipais de Vigo, Santiago, A Coruña, Lugo, Ferrol e Ourense. "E nesa liña está a traballarse con outras forzas de progreso", indicou.
Ademais, no caso de Ourense, asegurou que se está explorando a "mellor fórmula de gobernabilidade" e que, de non alcanzarse acordos que propicien maioría no concello e na deputación", o sistema "conduciría a que poida gobernar a lista máis votada".
"Os socialistas queremos gobernos de progreso alí onde sexa posible e expomos "un pacto pola rexeneración política" na Deputación de Ourense, pero os votos socialistas non son suficientes por si sós para alcanzar ese cambio político", sinala.
