Algúns militantes de Anova denuncian as críticas, entre elas as de Beiras, a Podemos e piden apostar pola confluencia

O deputado autonómico e exalcalde de Manzaneda Davide Rodríguez desexa "o mellor" ao seu expartido, do que se desvinculou hai xa medio ano e non recementemente como publicaron algúns medios.

Por Europa Press / Redacción | SANTIAGO DE COMPOSTELA | 11/12/2019 | Actualizada ás 15:42

Comparte esta noticia

Un pequeno grupo de militantes de Anova, entre os que hai militantes da FPG, presentou unha serie de emendas á tese política elaborada pola dirección da organización de cara á asemblea nacional que ten lugar este sábado en Teo. Nelas, propoñen que a postura do partido sexa máis clara cara a continuar coas alianzas mantidas con forzas como Podemos ou Esquerda Unida coa vista posta nas eleccións autonómicas de 2020. Tamén piden rebaixar as críticas á formación morada, entre elas, as protagonizadas por Xosé Manuel Beiras nas últimas semanas.

Estas emendas, ás que tivo acceso Europa Press, foron avaladas pola comisión configurada para avaliar os textos que serán sometidos a debate e votación no conclave deste sábado, do que sairá a postura de Anova para as galegas previstas para o próximo ano.

Unha cita na que non participará o exalcalde de Manzaneda e deputado no Parlamento de Galicia, Davide Rodríguez, que se desvinculou de Anova --partido no que militaba desde o nacemento da organización en 2012-- hai seis meses, cando o Grupo Parlamentario de En Marea se dividiu tras meses de desavinzas internas.

En declaracións a Europa Press este mércores, Rodríguez desexou "o mellor" ao seu expartido e expresou o seu desexo persoal de que "a esquerda nacionalista" configure unha candidatura unitaria para a cita coas urnas do próximo ano como vía para contribuír "a botar a Feijóo da Xunta".

Na última asemblea de Anova, na que foi electo como portavoz nacional o tamén deputado Antón Sánchez, Davide Rodríguez configurou xunto coa exparlamentaria nas Cortes Alexandra Fernández o bloque crítico co rumbo emprendido pola dirección da organización. Tres anos despois, ambos abandonaron Anova.

EMENDAS

En canto ás emendas, un grupo de persoas entre os que se atopan a exconcelleira de Culturas en Santiago Branca Novoneyra e outros militantes como Cristina Amor, Antón Dobao ou Pepe Arias; subscriben unha serie de propostas para reconfigurar a tese política exposta pola dirección e suavizar as críticas cara aos seus aínda socios na Cámara galega, Podemos e EU, aos que a cúpula da organización acusa de impor os seus intereses "de parte".

Así, estes militantes expoñen que Anova realice unha formulación máis clara que o que pon sobre a mesa a dirección cara á configuración dunha candidatura de confluencia nas eleccións autonómicas con EU e Podemos.

Ademais, realizan unha crítica velada cara á decisión da dirección de Anova de non presentarse ás eleccións xerais de abril e novembro tras non frutificar as conversacións con EU e Podemos, forzas que finalmente configuraron a coalición En Común, que obtivo dous deputados en ambos os comicios.

Deste xeito, nunha emenda de engadido, cren que a "capacidade de incidencia" da organización "en diferentes espazos sociais e institucionais" cambiou nos tres anos, polo que subliñan que "non é a mellor das opcións perder iniciativa no campo político-electoral".

"O ámbito político-electoral, insuficiente pero necesario, é ademais unha fonte irrenunciable de mobilización e de toma de conciencia popular. E nela é necesario seguir insistindo", remarcan estes militantes, que matizan a postura da dirección e propoñen que na tese que saia deste conclave figure un compromiso expreso con que a "acción política" de Anova pase "necesariamente" pola unidade popular, tal e como se mantivo ata agora con EU e Podemos.

"SALDAR CONTAS"

Outro dos puntos do documento proposto pola dirección que estes militantes expoñen cambiar é a análise que se realiza sobre os acontecementos rexistrados no espazo político nos últimos tempos e no que expresan o seu descontento co trato recibido por parte dos seus socios.

A cúpula cre que nas xerais e municipais deste ano "o trato que se dá" a Anova e as mareas locais "foi mostra da vontade de minorizar e subalternizar un espazo común que a pesar de todo segue tendo un potencial moito maior do que as silgas de parte teñen", di o documento nunha alusión velada a EU e Podemos. "En lugar de cooperación óptase pola imposición", engade.

Por contra, o grupo de militantes considera que Anova debe "formular en positivo" e a "lectura" do sucedido "debe facerse nun informe de xestión" e non a través dunha tese política. "Entendemos que non se trata de saldar contas senón de formular unha nova oportunidade".

Votación dos militantes de Anova nunha asemblea
Votación dos militantes de Anova nunha asemblea | Fonte: eldiario.es

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 6 comentarios

3 Dubidubidu

Pero non se van disolver hoxe? Non fixeron mal abondo?

2 Centroeuropeo

Era o esperábel da FPG, que desde hai moito mantén un matrimonio de comenencia con EU. E a maioría do beirismo hai tempo que está fora de Anova, ou na Marea ou na casa. Queda por ver o que fará o proprio Beiras e Noriega (que arrepentido debe de estar ese home!). Pero, desde o retiro de Beiras, Anova cotiza á baixa, así que Martiño N. e Antón S. apenas poden contar con postos de saída.

1 Fight!

Anova xa non ten máis de 20 militantes tirando polo alto. Cantos son os críticos agora?

1 Alpinista

21

2 vintedous

22

3 Alienao

Sí se puede!