O novo proceso integral de esclerose múltiple é considerado como "algo pioneiro" polo seu protocolo de teleasistencia

A Consellería de Sanidade e a de Política Social presentaron este martes un novo proceso integrado de tratamento da esclerose múltiple, elaborado en colaboración con asociacións de pacientes, que buscará o seu diagnóstico "precoz" e pór a disposición dos enfermos o "soporte social" e asistencial que precisen.

Con motivo do Día Nacional da Esclerose Múltiple, que se celebrará este mércores, o conselleiro de Sanidade, Jesús Vázquez Almuiña, presidiu a introdución deste novo procedemento no que tamén participou a Federación Galega de Esclerose Múltiple (Fegadem).

A esclerose múltiple é unha enfermidade que ten "unha prevalencia bastante importante" en Galicia, explicou Vázquez Almuiña, e que afecta "fundamentalmente a mulleres novas". En total, segundo datos expostos durante a presentación, hai na Comunidade entre 4.000 e 5.000 persoas que a padecen e hai tres mulleres afectadas por cada home.

O presidente da Sociedade Galega de Neuroloxía, o doutor José María Prieto, puxo o foco nas "dificultades" que existen á hora de diagnosticar a esclerose múltiple, cunha taxa de erro de "ata o 35 por cento". Iso si, celebrou que en Galicia están dispoñibles "todos os fármacos", algo que "non en todas as autonomías é así".

"ALGO PIONEIRO"

Para o tratamento desta enfermidade, o procedemento integrado presentado este martes é "algo pioneiro", tal e como o definiu o conselleiro de Sanidade. En concreto, comezará na parte asistencial "tratando de diminuír o tempo de diagnóstico, porque iso tamén é importante para a evolución da enfermidade, pero tamén introducindo aspectos novos como un protocolo de teleasistencia" dos pacientes.

"Trátase non só de que contemos con todos os medios de asistencia sanitaria da Consellería, senón tamén con todos os medios que a Consellería de Política Social ten", incidiu Vázquez Almuiña.

E é que despois de pór os tratamentos farmacolóxicos á súa disposición, "ás veces" os pacientes "necesitan solicitar a incapacidade". Por iso, este protocolo, explicou o conselleiro, tratará de facer "que sexa de forma rápida". Ademais de Vázquez Almuiña e o doutor José María Prieto, na presentación participaron o director xeral de Asistencia Sanitaria do Sergas, Jorge Aboal; o director xeral de Maiores e Persoas con Discapacidade, Ildefonso de Cámpaa; e a vicepresidenta de Fegadem, Teresa González.