Por Galicia Confidencial | Compostela | 03/02/2020 | Actualizada ás 15:12
Os populares xa atoparon outro nicho electoral no que tentar atacar ás perspectivas de cambio en Galicia. E é que a decisión do BNG de asinar cos independentistas de Esquerra Republicana (ERC), Junts, EH Bildu es a CUP un manifesto no que piden romper coa Monarquía española xa foi utilizado polo Partido Popular para atacar ao PSOE. Unha estratexia que fructificará, ou non, en función da importancia que lle dean os medios afíns ao PP que, polo momento, manteñen unha posición ambigua.
"Non deixa de chamar a atención este boicot do BNG á figura do rei", aseguraba este luns en rolda de prensa o voceiro popular Pedro Puy. "O problema xa non é o Bloque, senón o PSOE de Gonzalo Caballero que está gobernando cun partido que boicotea ao rei en concellos e deputacións", advertiu ao tempo que destacaba que este tipo de actitudes amosan o que sería un goberno de coalición cos nacionalistas en Galicia. "Un partido que boicotea as institucións do estado", lamentou.
Uns ataques que tivo que responder o líder do PSOE, Gonzalo Caballero, para lembrarlle que o seu partido é "un partido constitucional". "Asumimos a España constitucional e o papel da monarquía", dixo tamén en rolda de prensa. Con todo, defendeu os acordos de goberno co BNG en concellos e deputacións porque, alí onde está implantado este pacto, dixo, "é para resolver os problemas dos galegos e das galegas".
Tamén se amosou favorable a revisar o modelo de estado, pero, mentres non se poida, mantivo, "haberá que reforzar e poñer en valor a Constitución que temos desde hai 40 anos para tentar solucionar os problemas que hai". "E iso implicar manter o papel da monarquía", engadiu.
CRÍTICAS Á MONARQUÍA
Pola súa banda, e preguntada tamén a este respecto, a voceira en funcións do BNG, Olaia Rodil, quixo deixar claro que a postura antimonarquica da súa formación non é de agora. "O Bloque é republicano e demóctrata", dixo.
Con todo, defendeu a sinatura deste manifesto porque a presenza do rei español, dixo, en actos como a apertura da lexislatura en Cortes, "só serve para facer propaganda para maior gloria da Monarquía española".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.