Os deputados do BNG doan parte do seu soldo de marzo a proxectos de investigación fronte á COVID-19
Ana Pontón sinalou en Twitter que se trata dunha "pequena achega que para nada substitúe o papel que teñen que ter os gobernos".
Por E.P. | SANTIAGO DE COMPOSTELA | 04/04/2020 | Actualizada ás 13:46
Os deputados do Bloque Nacionalista Galego decidiron doar parte do seu salario correspondente ao mes de marzo a proxectos de investigación contra a pandemia da COVID-19.
A portavoz nacional do BNG, Ana Pontón, deu conta desta iniciativa este sábado a través do seu perfil da rede social Twitter, na que destaca que os nacionalistas queren "achegar o seu gran de area" con esta iniciativa.
Pontón asegura que se trata de "só un xesto", "unha pequena achega que para nada substitúe o papel que teñen que ter os gobernos". "Se algo aprendemos nestes días é que apoiar a ciencia e a investigación pública é clave se queremos estar mellor preparadas no futuro", indica.
A xefa de filas do Bloque afirma que non se sairá desta crise "con rebaixas de salarios dos e das traballadoras, nin debilitando ao público". "Hai recursos para enfrontar o desafío que vén; que a banca devolva os 60.000 millóns de euros do rescate, rebaixar o gasto militar ou subir impostos ás grandes fortunas", sostén.
A portavoz nacional do BNG fixo unha mención especial a Noa Presas e a Xosé Luís Rivas, 'Mini', quen "a pesar de que a partir do 5 de abril deixan de ter remuneración, fan igual a súa achega" no que considera "unha mostra de solidariedade e compromiso coa sociedade". "Rodearse de boa xente é clave na vida e na política", finaliza Pontón nunha publicación na que cita a todos que foron deputados do BNG na última lexislatura.
