Calculan que as CC.AA. perderán 7.000 millóns en ingresos no 2020

A axencia de cualificación crediticia Moody's alertou de que as comunidades autónomas perderán 7.000 millóns de euros en ingresos este ano polo coronavirus Covid-19, mentres que o seu déficit se situará entre o 1,7% e o 2,8%, segundo se desprende dun informe publicado este mércores.

"En 2020, as rexións españolas probablemente rexistrarán déficits que se desvíen de forma significativa do obxectivo, dado que España foi un dos países golpeados máis duramente polo coronavirus", indicou a analista de Moody's Marisol Blázquez.

"As posicións fiscais deterioraranse sobre todo pola alza dos custos sanitarios e a caída dos ingresos fiscais. Aínda que o Goberno central poida que incremente o obxectivo de déficit para 2020, estimamos que os perfís de crédito das rexións españolas se deteriorarán de forma xeneralizada polos maiores déficits orzamentarios e os futuros niveis de débeda", agregou a analista.

Moody's atribuíu a alza do déficit das comunidades autónomas de 2019, que pechou no 0,55%, fronte ao 0,28% de 2018, a un incremento dos custos que non foi compensado pola vía de ingresos debido á prórroga orzamentaria en 2019, que tivo como consecuencia menos transferencias desde o Goberno central e a perda do reembolso dos 2.500 millóns de euros de IVE.

Doutra banda, a calificadora de riscos indicou que, a pesar de que o Executivo está a axudar financieramente ás comunidades autónomas cos gastos sanitarios mediante compras directas de material sanitario ou transferencias adicionais, os gastos elevaranse "a niveis sen precedentes".

AXUDAS DA UDC AO ALUMNADO

A Universidade da Coruña (UDC) abriu unha convocatoria para optar a dous tipos de axudas por parte do alumnado, dirixidas a facilitar a súa formación no actual contexto de crise sanitaria, segundo informa o reitorado coruñés. En concreto, trátase de bolsas de colaboración para o acceso aos servizos de internet e de axudas para dificultades económicas sobrevindas polo COVID-19, "que ten como finalidade contribuír ao pago dos últimos prazos de matrícula".

O reitorado explica que a vicerreitora de Estudantes, María José Lombardía, xa enviou o pasado 9 abril unha carta a todo o alumnado da UDC para informalos da creación desta liña de axudas. Na súa carta, pon de relevo as dificultades xeradas polo actual contexto para seguir o curso, mentres que anima ao alumnado a participar nas tutorías virtuais, ademais de agradecerlles o seu traballo na actual situación.