A Xunta contradí os datos que sitúan Galicia como quinta autonomía con maior crecemento do paro

O Goberno galego defendeu este martes que Galicia é a terceira comunidade autónoma na que o seu mercado laboral resiste mellor á parálise económica derivada da pandemia da COVID-19. Unha afirmación que contradí os datos oficiais do Ministerio de Traballo e Economía Social, que indican que Galicia rexistra a quinta maior suba porcentual do paro e está por enriba da media estatal (+8%), só por detrás de Baleares (+15,6%), Cataluña (+12,2%), Canarias (+12%) e Madrid (+11,3%).

En concreto, o número de parados rexistrados nas oficinas dos servizos públicos de emprego en Galicia aumentou en 17.148 (+9,8%), ata un total de 191.629 desempregados. 

Respecto diso, a secretaria xeral de Emprego, Covadonga Toca, explicou que a pesar de que Galicia encadeaba seis anos consecutivos de caída do paro interanual nun mes de abril e descensos intermensuais desde o 2013, estas series positivas vense alteradas pola situación actual.

Neste sentido, sinala que Galicia pechou abril de 2020 con 25.403 desempregados máis que hai un ano, o que supón unha suba do 15,28% —case seis puntos menos que o conxunto do Estado—, situándose como "a terceira comunidade que menos acusa os efectos da crise sanitaria".

Con todo, o Goberno galego apunta que o nivel de paro é inferior ao rexistrado hai 11 anos, xa que en abril de 2009 había 210.662 parados fronte aos 191.629 actuais.

SERVIZOS, O SECTOR MÁIS PREXUDICADO

A Xunta explica que, aínda que o paro sobe en todos os sectores, o máis prexudicado é o dos servizos, onde se atopan oito de cada 10 parados, algo que tamén sucede na evolución mensual e que está motivado, entre outros factores, pola paralización da actividade na hostalaría e o peche de gran parte do comercio.

En canto ás afiliacións, Galicia perde no último ano 35.821 cotizantes (-3,54%), ata situarse nos 974.770 afiliados á Seguridade Social. Con todo, a Administración galega precisa que a baixada é menor que no conxunto do Estado (España baixa un -4,01%). Ademais, indica que se manteñen a niveis superiores aos de hai oito anos, cando Galicia sumaba 943.533 afiliacións.

No que respecta á evolución mensual, Toca indicou que o desemprego aumenta un 9,83% con respecto a marzo —sumando un total de 17.148 desempregado máis—, mentres que as afiliacións baixan unha 2,78% fronte ao 2,88% estatal.

Os datos reflicten un cambio de tendencia que se empezou a orixinar en marzo, cando se decretou o estado de alarma.

A Xunta destacou que, nesta situación, a súa prioridade é traballar en medidas que reactiven a economía co obxectivo de recuperar o mercado laboral galego.

Para iso, lembrou que na reunión do comité de expertos mantida o luns xa se marcou o camiño a seguir con medidas como solicitar ao Goberno que desvincule o ERTE de forza maior do mantemento actual do estado de alarma, flexibilizar a xornada laboral, introducir bonificacións nas cotas á Seguridade Social e deducións fiscais, así como protocolos de prevención para a volta á actividade.