Veterinarios, o colectivo que se di "desprezado" pola Xunta
Decenas de veterinarios acusan á Xunta de desprezalos por non consolidar unhas prazas que gañaron por oposición.
Por Galicia Confidencial | Santiago de Compostela | 19/05/2020 | Actualizada ás 21:20
Os veterinarios da Xunta que superaron as probas da OPE en 2018 acusan á Xunta de "desprezalos" durante anos e reclaman que o departamento de Función Pública axilice os nomeamentos para consolidar as súas prazas. Así apunta Ana, veterinaria da administración autonómica, que despois de varias queixas á Valedora do Pobo, escritos e chamadas dos aspirantes a Función Pública, a “día de hoxe o proceso segue inacabado e os aprobados aínda non foron nomeados na súa praza”.
A maioría do persoal que superou a última OPE está traballando como persoal laboral “o que supón que todos os meses están perdendo ingresos xa que o seu soldo é inferior”. Tamén destacan a imposibilidade de optar a outro posto diferentes ou traballar en provincias distintas ás de residencia.
Outra das consecuencias apuntadas polo colectivo veterinario da Xunta, é que e as listas de substitucións non poden actualizarse. Isto impide que varios profesionais que superaron as probas e que poderían realizar substitucións, están agora sen traballo. Tamén acusan ao director de Función Pública da Xunta, José María Barreiro, de desprezo polos opositores, ademais da falta de interese en rematar o proceso.
