Por Europa Press / Redacción | Ourense | 01/06/2020 | Actualizada ás 16:17
O alcalde de Ourense, Gonzalo Pérez Jácome, anunciou este luns que entre as funcións do seu persoal eventual se inclúe a de converterse en "gardiáns do tempo" para vixiar que "se cumpran os microprazos de cada procedemento burocrático" e "aplicar expedientes por baixo rendemento aos funcionarios que se extralimiten nas datas".
O rexedor subliñou que "será estrito con prazos límite" porque no Concello de Ourense "as máquinas atáscanse constantemente", segundo sinalou de maneira figurada, e "ten que haber persoas que saian ao rescate".
"Do mesmo xeito que se alguén comete unha infracción de tráfico, ten que haber uns captadores, ben sexan uns policías ou unhas cámaras, facendo esa mesma analoxía no Concello de Ourense, cando un prazo non se cumpre ten que haber persoas que digan o que fallou e axuden a desatascalo buscando responsables ou o que faga falta", sinalou.
Coa creación da figura dos "gardiáns do tempo", Gonzalo Pérez Jácome agarda que "todo flúa" para facer fronte ao problema da "herdanza de descoordinación e parálise dos últimos dez anos no Concello de Ourense".
O alcalde comparou as dependencias municipais cunha fábrica da que "no canto de saír cen coches ao día fano tres", pero mostrouse optimista ao sinalar que "isto se está solucionando aos poucos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.