O TSXG rexeita a petición de que o persoal da CRTVG poida seguir teletraballando
Fora unha solicitude rexistrada polos sindicatos CIG, CUT e CC.OO.
Por E.P. | SANTIAGO DE COMPOSTELA | 11/06/2020 | Actualizada ás 18:36
A Sala do Social do Tribunal Superior de Xustiza de Galicia (TSXG) rexeitou unha petición rexistrada polos sindicatos CIG, CUT e CC.OO. na Corporación Radio e Televisión de Galicia (CRTVG) para aplicar unha medida cautelar e que o persoal acollido ao teletraballo por mor da crise sanitaria polo coronavirus poida seguir nesta modalidade mentres estea vixente a normativa estatal que aposta polo traballo a distancia.
En concreto, a petición reclamaba que se manteña a situación mentres se aplique o artigo 5 do Real Decreto-lei 8/2020 de medidas urxentes extraordinarias para facer fronte ao impacto económico e social da COVID-19.
Na súa resolución, os xuíces din non apreciar "a especial urxencia para resolver sobre a medida cautelar" sen dar audiencia antes á empresa demandada. Entenden que a demanda dos sindicatos pretende "atacar" a resolución da Xunta do 8 de maio sobre o protocolo para que os empregados públicos se reincorporen aos seus postos de traballo.
Iso supón, engade o texto, "que se está discutindo a aplicabilidade da resolución", que afecta a todos os empregados públicos dependentes da Xunta. O protocolo, destaca, foi "negociado e ratificado" por dous dos sindicatos que presentaron a demanda, "polo que pode entenderse que consentiron a situación que agora pretenden reverter".
A resolución considera que "non existe evidencia ningunha" de que a empresa modificase durante a situación de emerxencia sanitaria os seus protocolos de marzo e que a documentación presentada coa demanda mostra que a CRTVG pediu cubrir un formulario no que os traballadores han de facer constar se desexan continuar co teletraballo por motivos de conciliación familiar, "sen que resulte evidente" que "impoña ningunha medida respecto diso".
