Xa son 450 as hectáreas queimadas no incendio de Monterrei

A Consellería do Medio Rural desactivou a alerta pola proximidade do lume ás casas (coñecida como 'situación 2') no incendio de Monterrei (Ourense), que polo momento arrasou 450 hectáreas e convértese no máis grande no que vai de tempada.

A alerta foi decretada ás 22,45 do venres pola proximidade do lume ao núcleo de Salgueira e foi desactivada ao fío das 09,45 deste sábado.

Segundo as primeiras estimacións, o incendio declarado ás 17,05 horas na parroquia de Flariz calcinou 450 hectáreas, parte delas parcelas agrícolas.

Para as tarefas de control mobilizáronse polo momento un técnico, once axentes, 21 brigadas, 18 motobombas, dúas pas, sete helicópteros e nove avións, así como efectivos da Unidade Militar de Emerxencias (UME).

Así as cousas, o incendio de Monterrei convértese no máis grande no que vai de verán en Galicia e sitúase ao bordo de ser considerado Gran Incendio Forestal (máis de 500 hectáreas).

VIANA DO BOLO

O lume de Monterrei supera en superficie afectada ao de Viana do Bolo (Ourense), que segue activo desde as 20,28 horas do xoves e leva xa queimadas unhas 250 hectáreas.

Este incendio, segundo os primeiros indicios, foi provocado ao detectarse ata cinco puntos simultáneos na parroquia de Vilardemilo. Ata o momento un técnico, 16 axentes, 44 brigadas, 20 motobombas, 2 pas, oito helicópteros e oito avións despregáronse na zona.

Ademais, o lume que afecta desde o mércores a Verín (Ourense), na parroquia de Queirugás, permanece controlado desde as 14,43 horas do venres. Segundo as últimas estimacións, a superficie afectada é de 144 hectáreas.