O director da CRTVG carga contra os traballadores
O Bloque lémbralle a Sánchez que os telexornais tratan dun xeito moi secundario o conflicto das participacións preferentes. Os traballadores denunciaron a suposta manipulación informativa a prol do PPdeG.
Por Galicia Confidencial | Santiago | 01/03/2013 | Actualizada ás 08:00
A deputada do BNG, Montse Prado denunciou este xoves, na Comisión de control da Compañía de RTVG, a”manipulación” informativa da TVG na cobertura da manifestación multitudinaria de afectados e afectadas polas participacións preferentes do pasado 2 de febreiro en Compostela.
A nacionalista argumentou as súas acusacións apoíandose nun comunicado do Comité de Empresa. Os traballadores denunciaron presións para non tratar os casos de corrupción que salpican ao PP galego, como os papeis de Bárcenas e a Operación Pokemon.
O director xeral do ente negou as acusacións e negouse a abrir unha investigación. Alfonso Sánchez Izquierdo acusaou ademais aos representantes sindicais de criticar a política informativa da CRTVG por outros intereses. En concreto, o ex-director de La Región lembrou que está aberta a negociación do convenio colectivo.
"Sobre unha suposta manipulación informativa, presión sobre os xornalistas e interferencias gobernamentais, teño que dicirlle que non responden á realidade", dixo o máximo responsábel da televisión pública galega. Izquierdo desmetiu a existencia de "ordes" por parte da súa dirección á televisión pública galega. En particular, o mandatario negou que os telexornais coloquen en posición secundaria as noticias sobre as preferentes, que segundo o BNG afectan a máis de 70.000 galegos.
O certo é que os principais cargos do servizo informativos están ocupados por profesionais que os seus compañeiros consideran próximos ao PPdeG. Algo similar, pero no sentido ideolóxico contrario, sucedía cando gobernaba o bipartito (PSdeG máis BNG).
Izquierdo si apoiou outras demandas dos asalariados. Por exemplo, mostrouse a prol do establecemento de órganos que garantan a independencia informativa. Tamén apousto porque unha maioría reforzada do Parlamento elixa o cargo que agora ocupa.
