A galega PharmaMar multiplica por catro a súa facturación en plena pandemia
Gañou 114 millóns de euros no primeiro semestre do ano.
Por Europa Press / Redacción | MADRID | 30/07/2020 | Actualizada ás 18:04
PharmaMar gañou 114 millóns de euros nos primeiros seis meses do ano, fronte ás perdas de 21 millóns de euros anotadas no mesmo período do ano anterior, nunha contorna marcada pola crise sanitaria, que non alterou a operativa da empresa.
Segundo informa o grupo farmacéutico español á Comisión Nacional do Mercado de Valores (CNMV), os ingresos neste período ascenderon a 169 millóns de euros, o que supón multiplicar por catro a cifra rexistrada un ano atrás.
O principal impulso a este nivel de facturación provén dos acordos de licenza e desenvolvemento, partida que arroxa 115 millóns, en contraste cos 630.000 euros do primeiro semestre de 2019, grazas ao acordo alcanzado en Estados Unidos para a distribución da lurbinectedina.
Así mesmo, as vendas dos seus produtos alcanzaron os 52,5 millóns de euros, un 35% máis, concentradas sobre todo na oncoloxía, que copa a maioría da facturación e que creceron un 29% respecto ao primeiro semestre de 2019.
O resultado bruto de explotación (Ebitda), pola súa banda, foi de 119 millóns de euros, fronte ao resultado negativo do ano pasado, do que se desprende unha marxe do 92,7% sobre as vendas, a 30 de xuño de 2020.
CORONAVIRUS
PharmaMar desenvolveu no mes de marzo os seus propios kits de diagnóstico de Covid-19 e subscribiu un acordo de distribución de test de técnica rápida de detección de anticorpos para o virus, o que supuxo unhas vendas de 5,6 millóns de euros, un 110% de incremento sobre o mesmo período do exercicio anterior.
En canto ao segmento de oncoloxía, iniciou un ensaio clínico con Aplidina para o tratamento de pacientes con Covid-19, cuxo obxectivo é avaliar a eficacia e a seguridade de plitidepsin nos afectados que precisen ingreso hospitalario, actualmente en fase de recrutamento de pacientes.
A pesar da chegada da pandemia a España, o grupo non tivo a necesidade de acollerse a medidas de regulación de emprego ou de redución de persoal, xa que a actividade comercial non se viu afectada pola situación.
CONTRA-SPLIT
Durante este semestre, a xunta xeral de PharmaMar aprobou a agrupación (contra-split) e cancelación das accións da sociedade para o seu troco por accións de nova emisión na proporción dunha acción nova por cada 12 accións preexistentes, que se materializou o 22 de xullo de 2020.
Polo momento, esta operación non lle sentou ben á acción, xa que, desde ese día, no que os seus títulos pasaron de valer menos de 10 euros a custar case 130 euros, a súa evolución en Bolsa saldouse cunha caída do 22% en menos dunha semana.
No entanto, só nesta xornada de presentación de resultados, os seus títulos rexistran un rebote que roza o 7%, recuperando de novo niveis próximos aos 100 euros.
