Por E.P. | PONTEVEDRA | 25/08/2020 | Actualizada ás 20:18
O alcalde de Vilaboa, César Poza, acometeu a reestruturación do Goberno local, no que o PSOE quedou en minoría despois de que o grupo municipal do BNG rompese o pacto de coalición.
"Todos os concelleiros teñen como prioridade o diálogo como camiño principal e o ben común dos veciños como único destino obrigado", precisou o rexedor, dirixíndose aos edís nacionalistas e populares que conforman a oposición.
Tras manter unha reunión interna o pasado luns para acordar a repartición de responsabilidades, o rexedor municipal detallou que, ademais de coordinar todas as áreas desde a alcaldía, tamén dirixirá persoalmente os departamentos de Cultura e de Obras que anteriormente xestionaban os edís nacionalistas Carlos Acuña e Cándido Rosendo.
En canto a Obras, licitaranse "con presa as actuacións máis importantes para o concello", precisou o goberno local nun comunicado, mentres que a nova programación cultural será "adecuada e diversa".
OUTRAS ÁREAS
Os departamentos de Promoción Económica e Sectores Produtivos, que atendía a portavoz municipal do BNG, Ornela Fernández, pasaron a Carmen Gallego, que tamén xestionará Facenda e Igualdade.
As áreas de Servizos e de Mocidade, que no antigo pacto de goberno formaban parte das competencias do BNG, recaeron en María Canosa e Brais Sánchez, respectivamente. Mentres que a primeira completará as súas responsabilidades con Servizos Sociais, Emigración e Cemiterios, o seu homólogo socialista manterá os seus deberes á fronte da concellaría de Deportes e Turismo.
Por último, José Manuel Piñeiro seguirá dirixindo Urbanismo e Infraestruturas e, a partir de agora, farase cargo tamén de Medio Ambiente e Aforro Enerxético, que atendía o exalcalde Francisco Costa.
A concelleira de Educación e Novas Tecnoloxías, María Dores Cerqueiro, completa a reasignación das áreas que viña xestionando o PSOE ao incorporar Sanidade.
Segundo o goberno local, esta nova repartición responde á situación xerada pola pandemia: "Sendo un goberno de convencemento, unido e corresponsable, a distribución das competencias axústase ás necesidades e á realidade actual do concello e os seus veciños". César Poza insistiu na necesidade de "conseguir o equilibrio entre diálogo e capacidade resolutiva" mantendo os "ideais" do PSdeG-PSOE, pero con Vilaboa como "único compromiso".
BNG
Pola súa banda, a portavoz do BNG foi convocada este mércores, 26 de agosto, por primeira vez desde a toma de posesión do novo alcalde o pasado xoves, a unha reunión con César Poza para abordar o traspaso de información e a planificación que o grupo nacionalista trazara das concellarías que xestionaba ata o pasado 17 de agosto, cando anunciou a súa decisión de abandonar o goberno local.
"Esperamos que se desenvolvan tanto os proxectos firmes como os que se deixaron encamiñados", sinalou Ornela Fernández. En diante, desde a oposición, o BNG de Vilaboa comprometeuse a "esixir e vixiar que sigan adiante e non se boten atrás" os plans "asentados" desde anteriores mandatos e que a cidadanía xa considera "como propios", concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.