Hablamos Español denuncia a "discriminación" do castelán en Galicia: "é unha anomalía democrática"
Nun novo informe presentado este mércores denuncian que hai "grandes empresas" que reciben diñeiro das autonomías para "eliminar" o castelán da súa rotulación.
Por Galicia Confidencial | SANTIAGO DE COMPOSTELA | 27/08/2020 | Actualizada ás 21:35
"Discriminación del español por las comunidades con lenguas bilingües". Esa é o título do último informe da asociación Hablamos Español, liderada pola viguesa Gloria Lago, que á parte é tamén presidenta de Galicia Bilingüe. Segundo denuncia a plataforma de Lago, os gobernos das comunidades autónomas con bilingüísmo "discriminan o emprego do español" nun amplo abano de usos que abrangue dende o emprego de documentos públicos ata a súa rotulación e campañas.
Dende a formación aseguran que a circunstancia actual a nivel lingüístico constitúe unha "anomalía democrática" que "non pasa en ningún país do mundo" e que, por conseguinte, "non se debería de aceptar como normal". E é que, segundo denuncia a plataforma, "ás persoas que piden ser atendidas en castelán, no mellor dos casos, fáiselles pasar por lentos trámites". Á parte, aseguran, estas persoas son tratadas con "desconsideración" por parte da administración, "como se fose unha rareza ou unha cuestión de ignorancia pedir o uso dunha lingua oficial ante a administración".
Dun xeito semellante, Hablemos Español centra as súas críticas nas "grandes empresas privadas" que "exclúen o castelán da súa rotulación", empregando tan só a lingua "autonómica". Dende a plataforma sosteñen que "algo así non se fai por motivos comerciais, obviamente, senón ideolóxicos". Por iso, explican, xa levaron adiante campañas para que os consumidores "fagan valer a súa forza", en particular con respecto ás empresas que "reciben diñeiro dos gobernos autonómicos para eliminar o español da súa rotulación".
GALICIA, "Á CABEZA" DA "DISCRIMINACIÓN"
A conclusión do estudo desenvolto pola formación comandada por Gloria Lago é que durante o confinamento incrementouse a "imposición lingüística" e o "diñeiro público destinado a sufragar" esta "eliminación ilegal" do castelán. Segundo explican dende a plataforma, a estela de "discriminación" ó castelán contaría con Cataluña e Galicia "á cabeza deste antidemocrático comportamento", se ben se estende a "todas as comunidades bilingües "en maior ou menor medida".
O comunicado da asociación remata facendo fincapé na necesidade de respectar a cooficilidade dos territorio, sen importancia de que "en algunhas ocasións se poida comprender ou adiviñar a mensaxe na lingua autonómica". A formación, con todo non oculta que "sería máis sinxelo, máis barato e máis comprensible para todos rotular en español en toda españa, pero supoñería vulnerar os principios de cooficialidade".
