Adif acusa a Xunta de "actitude discriminatoria" con Lugo por "negarse" a financiar áreas comúns da intermodal

Adif considera a "negativa" da Xunta a participar no financiamento das áreas comúns que engloba o proxecto da intermodal de Lugo "unha actitude discriminatoria fronte ao acordado noutras estacións galegas". Pola súa banda, a conselleira de Infraestruturas, Ethel Vázquez, demanda a Concello e administrador ferroviario que "plasmen nun convenio o seu compromiso" coa estación intermodal.

Mentres, o Consistorio lugués pon o foco sobre que as partes "avanzan na solución do edificio de Correos para a intermodal" e a alcaldesa, Lara Méndez, subliñou a "necesidade" de dar con "puntos de encontro para que Lugo non quede descolgada respecto ao resto das urbes galegas".

Despois do encontro deste luns, de carácter técnico e por medios telemáticos, as partes volvéronse a citar dentro dunha semana.

ADIF

Tras a reunión, por unha banda, o Ministerio de Transportes sinala que Adif e Adif Alta Velocidade emprazaron á Xunta "para que presente a súa primeira proposta sobre o cofinanciamento da área de transporte intermodal de Lugo". O seu obxectivo, resalta, é "poder iniciar a execución das obras canto antes".

O encontro finalizou "sen acordo", segundo o Ministerio, no relativo ao cofinanciamento das áreas comúns que comprende o proxecto, "fundamentalmente accesos e aparcadoiro subterráneo".

Por iso, apunta que haberá unha nova reunión "nun prazo máximo de sete días para continuar traballando de forma conxunta". "Os proxectos atópanse nun estado moi avanzado a pesar da falta de acordo para a subscrición do convenio", advirte o departamento que dirixe José Luís Ábalos.

Ademais, concreta que se debateu sobre "as alternativas" de construción do aparcadoiro da nova área intermodal e o seu financiamento.

O aparcadoiro subterráneo previsto, baixo a futura estación de autobuses, ten unha valoración estimativa en execución material en 5,2 millóns, mentres que unha alternativa en superficie roldaría os 0,6 millóns, de acordo cos datos de Transportes.

Adif defende que a construción do aparcadoiro "debe formar parte dos acordos recollidos no convenio, e o seu financiamento debe ser consensuado e compartido".

Na reunión tratáronse outras cuestións relativas ao borrador do convenio necesario para a execución da actuación, e que resultan "fundamentais para que poida pecharse un texto definitivo", subliña.

Un proxecto que xa acumula un atraso "considerable, en ningún caso provocado polo ministerio nin por Adif", segundo incide.

Así, sinala que Adif insistiu na necesidade de acordar a redacción do convenio entre o catro partes intervenientes, que establecerá a forma de financiamento e as achegas económicas de cada unha, para un proxecto que inclúe o desenvolvemento dunha nova estación ferroviaria, a execución dunha estación de autobuses, a disposición dunha praza urbana e un paso inferior de permeabilidade entre ambos os lados das vías.

AVANCES

A maiores, sinala que na reunión pechouse un acordo para "axilizar" a tramitación da corrección do erro na catalogación como protexido do edificio de Correos.

Tanto Adif como o Concello consideran que este inmoble non está realmente catalogado nin reúne as condicións para ser considerado edificio protexido, di.

E a subsanación deste erro na catalogación resulta "fundamental" para que o deseño global da área intermodal prevista no anteproxecto acordado polas catro administracións en 2019 poida materializarse nos correspondentes proxectos.

"Adif, no seu ánimo por seguir apostando por este proxecto, decidiu levantar a suspensión na redacción dos proxectos básico e de construción da área, co compromiso de Xunta e Concello de solucionar os problemas co edificio de Correos", engade.

Por iso, agrega que Adif avanzará na redacción "en paralelo á tramitación da descatalogación", que acometerán Consistorio e Xunta nun prazo estimado de entre catro e cinco meses.

XUNTA

Pola súa banda, a Consellería informou de que presentou o proxecto dunha nova terminal de autobuses "ambiciosa e esteticamente coidada" para Lugo e de que o deseño para a praza da actual estación está tamén xa "perfilado".

O proxecto da nova estación, segundo apunta, prevé unhas instalacións de 550 metros cadrados de superficie en dous pisos e un total de 23 dársenas para os autobuses.

A titular do departamento, Ethel Vázquez, segundo Infraestruturas, insistiu na "urxencia de recoller nun convenio os compromisos de cada administración coa intermodal, como se fixo nas estacións que a Xunta executa en Santiago, Ourense e Vigo e acábase de facer na Coruña".

Pola súa banda, "o Goberno galego ratifica o seu compromiso de financiar a nova estación de autobuses de Lugo e de participar no financiamento dos elementos urbanísticos comúns", asegura.

Tamén subliña que o aparcadoiro foi deseñado por Adif para atender as necesidades da terminal ferroviaria e propón que se financie con recursos do fondo europeo de reconstrución.

CONCELLO

O proxecto da intermodal de Lugo inclúe a construción dunha nova estación ferroviaria e de autobuses e a execución dunha praza urbana e dun paso inferior de permeabilidade entre ambos os lados das vías, apunta o Concello.

Segundo o Consistorio, os aspectos nos que "non hai acordo" son os relativos ao cofinanciamento das áreas comúns é "en especial" nos accesos e o aparcadoiro subterráneo.

Indica, así mesmo, que a presidenta de Adif, Isabel Pardo, "comentou" que o administrador de infraestruturas ferroviarias "xa estaba en disposición de redactar o proxecto construtivo da estación ferroviaria para poder licitar".

Insistiu na necesidade de que "non se demoren os tempos". Pola súa banda, o Concello traballará coa Xunta para descatalogar o edificio de Correos "nun prazo menor de seis meses".