Dispáranse os contaxios masivos en residencias: 150 infectados novos en dous centros de Ourense
Hai 106 novos infectados nun centro de Pereiro de Aguiar e outros 46 en Monterrei.
Por Europa Press / Redacción | OURENSE | 08/10/2020 | Actualizada ás 14:33
Os focos masivos en residencias, lonxe de controlarse, agravanse. As autoridades sanitarias detectaron dous novos gromos de grandes dimensións en residencias da provincia de Ourense, a máis afectada en Galicia nestes momentos pola covid-19, que suman máis de 150 infectados.
En concreto, trátase da residencia Os Gozos, de Pereiro de Aguiar, onde se detectaron 106 novos contaxios de coronavirus, así como a residencia Val de Monterrei, onde hai 46 usuarios infectados.
Con iso, na residencia de Pereiro de Aguiar son xa 109 os maiores contaxiados, o que a converte no segundo centro de Galicia con máis casos tras a DomusVi Lugo, de Outeiro de Rei, que mantén 130 casos activos, aínda que neste caso están en diminución.
Así mesmo, a residencia Val de Monterrei, con 46 afectados, convértese na terceira con máis casos, unha cifra que iguala con outro centro da provincia de Ourense, Nosa Señora do Viso, de Lobeira. A Residencia do Incio, pola súa banda, mantén 42 usuarios infectados.
A evolución da covid-19 na provincia de Ourense nos últimos días levou á Xunta a impor nesta provincia algunhas das medidas máis duras para a súa contención, entre elas o confinamento perimetral da cidade de Ourense e do municipio de Barbadás, que están pechados desde esta medianoite.
OUTRAS RESIDENCIAS AFECTADAS
Continúan activos 13 contaxios na residencia Santa Marta de Vigo, onde na última xornada foron dados de alta catro casos, e 11 na residencia As Salinas de Ourense, onde tamén se produciu unha curación.
A Residencia Ballesol de Oleiros rexistrou o falecemento dun dos seus usuarios enfermos, e mantén seis casos, un máis da Torrente Ballester da Coruña, que no último parte da Xunta suma dous novos contagios.
Sen cambios mantense a situación na DomusVi Coruña de Oleiros, con dous casos, a residencia de Arteixo, cun, Nosa Señora dos Milagres de Barbadás, cun, e a residencia Virxe Branca de Ourense, onde tamén hai un caso activo. Pola contra, na Comunidade baixan os traballadores de residencias afectados pola covid-19, que pasan dos 107 deste mércores aos 99 comunicados o xoves.
