A pandemia acelerou a transformación dixital: avanza en seis meses o que tardaría cinco anos

Seis meses de pandemia serviron para avanzar na transformación dixital de empresas e organizacións o que se esperaba que se producise no próximos cinco anos, segundo constataron representantes do sector no foro de referencia neste ámbito, GaliciaTIC.

Este mércores empezou na Cidade da Cultura de Santiago unha nova edición deste foro, que cumpre 18 anos e adapta o seu formato a unha nova modalidade que combina os ámbitos presencial e en liña. Máis de 400 persoas, segundo a organización, inscribíronse para participar nunha cita na que intervirán máis dunha trintena de expertos.

O director de GaliciaTIC 2020, Miguel Merino, durante a sesión inaugural, destacou que o contexto xerado pola covid-19 obrigou a acelerar o proceso de transformación dixital tanto nas empresas como nas administracións públicas. "Neste seis meses de pandemia produciuse un avance antes esperado para o próximos cinco anos", aseverou.

Neste momento, segundo destacou, "a transformación dixital deixou de ser opcional e esta necesidade leva un impulso para certos sectores con baixa intensidade de implantación tecnolóxica, non só para evitar a fenda dixital, senón pola esixencia desta nova era".

Na sesión de apertura, na que se analizaron os retos da transformación dixital en Galicia, participaron a directora da Amtega, Mar Pereira; Luís Álvarez-Sestelo, presidente da Asociación de Empresas de Tecnoloxía de Galicia (INEO); Carlos Suárez, director de Edisa; Fernando Vázquez, CEO e fundador de Imatia e José Luís Latorre, director xeral de Inycom.

Pereira, na súa intervención, asegurou que se está "nun proceso de rápida adopción de tecnoloxías xa existentes" e botou en falta "un maior acompañamento de Europa e as súas institucións para fortalecer o sector TIC neste momento".

Empeza unha nova edición de GaliciaTIC. REMITIDA (GALICIATIC) | Fonte: Europa Press